Navenda Giştî ya Komeleya Hiqûqnasên ji bo Azadiyê (OHD), rapora xwe ya têkildarî binpêkirinên mafan ên di pêvajoya pîrozbahiyên Newroza sala 2026’an de hatine kirin, aşkera kir. Rapor, li avahiya Şaxa Egîtîm Senê ya Antalyayê hat ragihandin. Rapor, ji hêla endamên Nûnertiya OHD’ê ya Antalyayê Erol Koçer ve hate xwendin.
Koçer da zanîn ku rapora wan di heman demê de belgeyeke mafên mirovan a asta mudaxileya li dijî maf û azadiyan a Tirkiyeyê radixe pêş çavan e. Koçer, got ku di pêvajoya Newrozê de binpêkirinên hatine kirin ne şexsî lê plankirî, zêde û sîstematîk bûn.
Koçer da zanîn ku Newroz ji bo gelê Kurd sembola nasname, çand û hafizeyeke kolektîf e û got: “Lê di pîrozbahiyan de welatî demekî dirêj di têketina qadê de hatin sekinandin, li gelek noqteyan lêgerîn hate kirin, rengên kesk, sor û zer û gotina Kurdistanê, cil û bergên Kurdî û sembolên din bi awayekî keyfî hatin qedexekirin. Ev jî mudaxileyeke aşkera ya li dijî azadiya xweîfadekirin û nasnameya çandî ye. Ji dirûşman heta gerandina govendê û gotina stranan, ji ber gelek tiştên din lêpirsîn hatien vekirin. Tevlibûna Newrozan yekser hate krîmînalîzekirin. Ev jî binpêkirina rêgezên civaka demokratîk e.”
Di berdewamê de Koçer da zanîn ku li gorî tespîtên wan, di pêvajoya Newrozê de herî kêm 253 kes hatin binçavkirin, 63 kes hatin girtin, der heqê 112 kesan de biryara tevdîra kontrola edlî hate dayin, di nav binçavkirî û girtiyan de zarok jî hebûn, li gelek bajaran di dema binçavkirinê de îşkence û miameleya xerab li welatiyan hate kirin, zarok rastî tundiya fîzîkî hatin an jî li ber çavên wan tundî li endamên malbata wan hate kirin û xwest kul der heqê van binpêkirinan de yekser lêpirsîneke bibandor were destpêkrin. Koçer, xwest ku der heqê peywirdarên ewlekariyê de kirariyên edlî û îdarî bên destpêkirin û sepana necezakirinê bi dawî bibe.
Koçer diyar kir ku binçavkirin, girtin û binpêkirinên di pêvajoya Newrozê de hatine kirin li dijî ruhê Pêvajoya Aştî û Civaka Demokratîk e û zirarê dide baweriya civakê û zemîna çareseriya demokratîk. Koçer, herî dawî jî xwest ku binçavkirin û girtinên bi keyfî bi dawî bibin, der heqê îşkence û miameleya xerab de lêpirsîneke bibandor bê destpêkirin, zarokên girtî bên berdan, sepanên pêşiya mafê azadiya xweîfadekirin û civînan digirin bên bidawîkirin û Newroz weke cejna fermî bê qebûlkirin.
