Qeyûmê Şaredariya Akdenîzê dema şaredarî ji aliyê DEM Partiyê ve dihat birêvebirin, bi gotina “Qadên xizmetê yên şaredariyê nayên firotin” doz vekir, niha jî ew bi xwe difroşe. Qeyûm bi îhaleya 680 milyonî ku wê di 16’ê Nîsanê de pêk bîne re hem dibe dozdar hem jî firoşkar.
Di 13’ê Çileya 2025’an de Hevşaredarên DEM Partiyê Hoşyar Sariyildiz û Nûriye Arslan û 3 endamên meclîsa şaredariyê bi hincetên bê bingeh ji peywirê hatin dûrxistin û Qeymeqamê Akdenîzê Zeyit Şener weke qeyûm tayînî Şaredariya Akdenîzê ya Mêrsînê hate kirin. Piştî qeyûm tayînî şaredariyê hate kirin, li ber avahiya şaredariyê çalakî hatin lidarxistin. Polîsan êrîşî çalakiya ku parlementerên DEM Partiyê Alî Bozan û Perîhan Koca beşdar bibûm kirin, hin çalakvan birîndar bûn û gelek hatin binçavkirin. Çalakiyên li Taxa Yenîpazarê dernegiya şevê dom kir; ciwanên daketin kolanan agir vêxistin û li dijî êrîşa polîsan li ber xwe dan.
Qeyûmê ku şaredarî dagir kir, cihê 150 karkeran guherand. Ev yek rê li ber astengiya xizmeta hilberînê kir. Ajokarên wesayitên giran, pispor ên wek civaknas, psîkolog û mîmaran şandin qadên cuda. Xebatên Midûriyeta Polîtîkayên Jinê hatin rawestandin û hin xebatkar jî sirgûn kirin.
MALÊN ‘NAYÊN FIROTIN’ DIFIROŞIN
Qeyûm 5 milkên giranbuha yên ku firotina wan ji hêla dadgehê hatine rawestandin wê di 16’ê Nîsanê de derxe îhaleyê. Di îhaleyê de wê 27 hezar û 477 metrekare bi buhayê 680 milyon TL bên firotin. Qeymeqamê Akdenîzê Zeyît Şener berê ji bo mal û milk neyên firotin doz vekiribû. Şener niha jî heman mal û milkan di bin navê qeyûm de dide firotin. Şener ê ku doza “Nabe ku were firotin” vekiribû, piştî ku li şaredariyê qeyûm hat tayînkirin, rayeya firotinê ji meclîsa şaredariyê wergirt. Bi vê yekê re hem dozdar û hem jî bersûc e; hem qedexeker û hem jî firoşkar e.
MAL Û MILKÊN WÊ BÊN FIROTIN
Mal û milkên ku ji bo firotanê têne pêşkêşkirin ev in:
* Taxa Nusratiye, girava 61, parsela 206: 375 milyon TL
* Taxa Mesûdiye, girava 909, parsela 4: 170 milyon TL (avahiya TEDAŞ’ê ya berê)
* Taxa Nusratiye, girava 10214, parsela 2: 50 milyon TL
* Taxa Yaka, girava 137, parsela 9: 45 milyon TL
* Taxa Yaka, girava 9524, parsela 6: 40 milyon TL
Di lîsteya firotinê de ya herî balkêş firotina avahiya TEDAŞ’ê ya kevn e. Şaredarê AKP’ê yê wê demê Mustafa Gultak xwestin ku di sala 2022’yan de avahiya TEDAŞ’ê bifroşe, lê ji ber rayeya firotinê ji meclîsê negirtibû, nehat firotin. Piştî ku 5 endamên meclîsê yên HDP’ê hatin binçavkirin, Gultak civîna awarte ya meclîsê li dar xist. Îro jî senaryoyek wiha derdikeve pêş; Hevşaredar û endamên meclîsê yên hilbijartî yên DEM Partiyê tên girtin, piştre qeymeqam weke qeyûm tê tayînkirin û mal û milkên şaredariyê tê firotin.
DI ALIYÊ HIQÛQA CEZAYÊ Û ÎDAREYÊ DE BI PIRSGIRÊK E
Parlamenterê DEM Partiyê yê Mêrsînê Alî Bozan diyar kir ku nakokiyên di belgeyan de rê li ber bêhiqûqiyê vedike û wiha got: “Heman kes hem wekî qeymeqam û hem jî wekî qeyûm doza ku wî bi xwe ji bo pêşiya firtona wan were girtin vekiribû, niha dibêje ‘ez ê bifiroşim’. Ev rewş di vê hem di aliyê hiqûqa îdareyê û hem jî di aliyê hiqûqa cezayê de divê were lêkolînkirin.
Ev firotin ne tenê meseleya firotina çend avahî, parsel an giravan e. Ev firotineke ku biryara dadgehê ya rawestindina firotinê heye û di rewşeke ku meclîsa şaredariyê hatiye fesihkirin de tê kirin. Di rastiyê de, ew gav bi gav veguhestina demokrasiyê ye. Divê gelê Mêrsînê tiştên li Şaredariya Akdenîzê diqewimin ne tenê weke firotina milkan, di aliyê demokrasî, edalet û pêşeroja çavkaniyên gel de binirxîne.”
