Navenda Ragihandinê ya QSD’ê der barê mijarê de daxuyaniyek weşand.
Di daxuyaniyê de hate gotin, şervanên QSD’ê îro (Şemiyê) êrîşeke şaneyên DAÎŞ’ê a li dijî erebeyeke leşkerî ya şervanan têk bir.
Di daxuyaniyê de hate diyarkirin ku êrîş li gundê Tikêhî yê herêma Bisêra ya li rojhilatê Dêrazorê, dema şervanan mîsyona xwe ya parastina ewlehiyê bi cih dianî, pêk hat.
Di dewama daxuyaniyê de hate ragihandin ku şervanan bersiva êrîşkaran da û şer derket. Di encamê de çeteyek hat kuştin, çeteyek jî birîndar bû û yên din jî reviyan.
Li gorî daxuyaniyê, RBG’yek tevî guleyên wê û motorsîklêteke ku çeteyan di dema êrîşê de bi kar anî, ketin destê şervanan.
Di daxuyaniyê de hate gotin, 6 çete beşdarî êrîşê bûne.
Navenda Ragihandinê ya QSD’ê daxuyand ku piştî têkbirina êrîşê, şervanan tavilê operasyona paqijî û lêgerîna li çeteyên reviyayî û birîndarekî wan da destpêkirin. Hate diyarkirin ku operasyona lêgerînê dewam dike.
Navenda Ragihandinê ya QSD’ê di dawiya daxuyaniyê de diyar kir ku dê hewldanên xwe yên parastin û mîsogerkirina ewlehiya herêmê bidomînin û bi xurtî bersiva êrîş û gefên li ser aştiya navxweyî û ewlehiya sivîlan bidin.
