Daxuyanî bi pêşengiya TJA, Platforma Jinan a Dîcle Amed (DAKAP) û rêxistinên cuda yên jinan, hatin dayîn. Di daxuyaniyên hatine dayîn de, bal hat kişandin ku qetilkirina jinan siyasî ye û banga edaletê hate kirin. Rêxistinên jinan, destnîşan kirin ku ne tenê Gulistan Doku, Rojîn Kabaiş û mirinên din ên bi guman ên jinan jî divê bên ronîkirin.
Di çalakiya li navçeya Cizîrê ya Şirnexê de pankarta bi nivîsa “Ji bo Gulistan Doku edalet” hat vekirin û axaftvanan xwestin ku doz bê ronîkirin û berpirsyar bên darizandin.
Her wiha, di daxuyaniya li ber edliya Amedê de jî nerazîbûn hat nîşandan ku di lêpirsînê de delîl tên veşartin û pêvajo bi bandor nayê meşandin. TJA, Komeleya Jinan a Rosa û malbata Rojîn Kabîş beşdarî daxuyaniya li vir bûn. Endama Navenda Mafên Jinan a Baroya Amedê Îrem İlhan got, “Wekî Tora Têkoşîna li Dijî Tundiyê ya Amedê û Platforma Jinan a Dîcle Amedê, em ji raya giştî re radigihînin ku heta heqîqet derkeve holê, berpirsiyar werin darizandin û edalet pêk were, em ê ji bo Gulistan Doku, Rojîn Kabaiş, Rojwelat Kizmaz û hemû jinên ku aqûbeta wan bi awayekî gumanbar di tariyê de hatiye hiştin, têbikoşin, pêvajoyê bişopînin û dengê xwe bilind bikin.”
Di çalakiya li Elîhê de, xwişka Rojwelat Kizmaz Roza Kizmaz daxuyaniyên girîng dan. Roza Kizmaz, diyar kir ku xwişka wê piştî windabûyînê sê rojan sax bû û got, “Xwişka min a ku 3 rojan sax bû nehat dîtin. Ev karekî ku diviyabû di saetekê de pêk hatiba” û nerazîbûn nîşanî rayedaran da.
Her wiha di daxuyaniyên li Riha, Edene û Mêrsînê de banga pêkanîna lêpirsînên bi bandor hat kirin.
Di çalakiyan de, hat destnîşan kirin ku tundiya li dijî jinê ferdî nîne, pirsgirêkek binyewî û siyasiye û hat gotin, “Heta heqîqet bê ronîkirin û berpirsyar bên darizandin dê têkoşîn bidome.”
