Li Dêrik a Mêrdînê şîna Mehmet Çevîren ê ku li Girtîhgeha Ewlehiya Bilinda a Qubînê bi awayekî guman jiyana xwe ji dest da, bi girseyî hat ziyaretkirin. Bi pêşengiya MEDBYA-DER û TÛHAY-DER’ê ku nûnerên partiyên siyasî û rêxistinên girseyî yên demokratîk jî di nav de, gelek kes serdana şînê kirin.
Di şînê de dirûşmeyên “Bijî berxwedana zîndana” û “Şehîd namirin” hatin berzkirin. Paşê Hevseroka TÛHAY-DER a Mêrdînê Ayşe Bozan li ser navê beşdaran sersaxiya malbatê kir. Hevseroka MEBYA-DER a Mêrdînê Makbûle Okmenê jî anî ziman ku ew ê Çevîren û kesên mîna Çevîren di têkoşîna gelê Kurd de jiyana xwe ji dest dane, ji bîr nekin.
Parlamenterê Partiya Demokrasî û Wekheviyê ya Gelan (DEM Partî) ê Mêrdînê George Aslan jî bal kişand ser astengkirina berdana girtiyên 30 sal in di girtîgehê de ne û got ku ew ê dest ji vê bernedin û bişopînin.
Birayê Çevîren Welat Çevîren jî diyar kir ku ew bawer nakin ku birayê wan “xwe kuştibe” û got: “Em bang li partiyên siyasî, rêxistinên girseyî yên demokratîk û parêzeran dikin; ji kerema xwe di vî warî de li cem me bin.”
Serdan bi duayan bi dawî bû.
