Desteya Rêveber a Federasyona Rêxistinên Mafên Mirovan a Sûriyeyê, li gel bi dehan rêxistinên mafên mirovan, jinan û civaka sivîl a Sûriyeyê, îro bangeke hevbeş a lezgîn kir û daxwaza bidawîanîna binpêkirin û êrişên hovane yên li dijî Kurdan ên li Sûriyeyê kir. Rêxistinan diyar kir ku ew binpêkirin sûcên şer in.
Di daxuyaniyê de ku îro hat weşandin, rêxistinan da zanîn ku hêzên hikumeta demkî ya Sûriyeyê, komên çekdar ên Sûriyeyê û milîsên eşîran, di bin çavdêrî û hevkariya hêzên Tirk de, bi armanca terorîzekirina sivîlan û koçberkirina wan, binpêkirinên wekî kuştin, girtina bêserûber, dorpêçkirin, birçîkirin, koçberkirina bi zorê û guhertina demografîk pêk anîne.
Rêxistinan destnîşan kir ku ev kiryar binpêkirinên giran ên qanûnên mirovî yên navneteweyî û mafên mirovan in. Her wiha dan zanîn ku di êrişan de bi sedan qurbanî çêbûn, kes hatin kuştin, birîndarkirin û koçberkirin, her wiha komkujiyên di asta qirkirina nîjadî de hatin kirin.
Rêxistinan bang li Neteweyên Yekbûyî, Konseya Ewlehiyê, Konseya Mafên Mirovan û rêxistinên navneteweyî û herêmî kir ku tavilê tedbîran bigirin. Rêxistinan ev daxwaz rêz kirin:
“Zextên cidî û bibandor li ser Hikûmeta Demkî ya Sûriyeyê were kirin da ku êrişa xwe ya rojane li dijî Bakur û Bakurê Rojhilatê Sûriyeyê, binpêkirinên xwe yên li dijî sivîlên Kurd, dorpêçkirin û birçîkirinê li dijî deverên Kurdan rawestîne.
Zextê li ser hikumeta demkî û komên çekdar ên Sûriyeyî yên ku bi wê re hevkariyê dikin bikin, ji bo rawestandina êrişên li ser sivîlan, cihên îbadetê, û milkên taybet û giştî, û her weha rawestansina talankirina berhemên çandiniyê û dizîna dikan û malan.
Vekişîna bê şert û merc ji hemû axa Sûriyeyê li bakur û bakur rojhilatê Sûriyeyê û deverên di bin Rêveberiya Xweser de, û vegera ser maseya danûstandinan ji bo gihîştina çareseriyek neteweyî ya berfireh.
Rawestandina hemû awayên girtin, revandin û windakirina bi zorê û serbestberdana bê şert û merc a hemû kesên ku hatine revandin û girtin.
Vegera sivîlên koçber û reviyayî ji Heleb û bakur û bakur rojhilatê Sûriyeyê, û rakirina hemû astengiyên ku rê li ber vegera wan bo gund û malên xwe digirin.”
