Di 1’ê Nîsanê de di navbera Meclîsa Giştî ya Taxên Şêx Meqsûd û Eşrefiyeyê û nûnerên hikûmeta Şamê de peymaneke ji 14 xalan pêk tê hate îmzekirin. Ji bo cîbicîkirina xala 5’an a peymanê, îro her du aliyan dest bi xebatên rakirina bend û çeperên li kolanên her du taxan û taxên din ên Helebê kirin. Li gel vê rêyên çûyîn û hatinê yên taxên Şêxmeqsûd û Eşrefiyê piştî 4 mehan û vir de carek din vebû.
Bi hevkariya di navbera Şaredariya Gel a Taxên Şêxmeqsûd-Eşrefiyê û Şaredariya bajarê Helebê de sengerên axî hatin rakirin. Her wiha bendên kontrolê yên li derdora her du taxan jî veguherîn nuqteyên ewlehiyê yên hevbeş di navbera Hêzên Ewlekariya Hundirîn û Saziya “Ewlekariya Giştî”. Li derdora her du taxan 7 nuqteyên ewlehiyê yên sereke hene û wiha ne: Cezîre, Ewarid, Çerxerêya Cendol, Lêremon, Çerxerêya Şîhan, nuqteya Parkê (Hedîqa) û Telet (kaşa) Eşrefiyê.
Brpirsekî hêzên “Ewlekariya Giştî” û nûnerê desthilata Şamê yê peymana bi Meclîsa Giştî ya Taxên Şêxmeqsûd û Eşrefiyê re Suraqa Emorî ji ANHA’yê re axivî û got: “Piştî rakirina sengerên axî û veguherandina 7’ê nuqteyên kontrolê ji bo nuqteyên hevbeş di navbera Hêzên Ewlekariya Hundirîn û Saziya ‘Ewlekariya Giştî’ de, ew ê ji bo derxistina tevahî girtiyên di girtîgehan de bixebitin.”
Têkildarî bersivdana pirsên gavên bê wê çi bin, Emorî ev tişt got: “Berdana girtiyên her du aliyan bêyî rawestan dewam dike û wê di demeke nêz de girtî bên berdan. Rakirina sengerên axî û hevbeşbûna rêvebirina nuqteyên kontrolê, ji bo misogerkirina veguhestina ewle beriya berdana girtiyên mayî, gava yekem bû. Saziyên ewlehiyê yên hevbeş wê bibin mertal û sivîlan li hember êrîş û gefên li dijî ewlehî û aştiyan wan biparêzin.”
