Endama Fermandariya Giştî ya Yekîneyên Parastina Jin (YPJ) Rohilat Efrîn di Konferansa “Hevgirtina Jinan Bingeha Avakirina Edalet û Demokrasiyê ye li Sûriyeya Nenavendî û Yekgirtî” destnîşan kir ku têkoşîna jinan a li Bakur û Rojhilatê Sûriyeyê berhema aqil û ruhê berxwedanê ye û got: “Vê têkoşînê em gihandin azadiyê.”
Rohilat Efrîn destnîşan kir ku şoreşa Sûriyeyê ya ji 2011’an ve ne tenê pirsgirêkeke siyasî bû, her wiha ew projeyeke mirovî ya giştî bû û got: “Jiyan bê parastin negengaz e. Dema ku gef hebin tu mal, tax, sazî û partî nikare bimîne. Ji ber wê jî xweparastin şertekî sereke yê domandina civakê ye.”
Rohilat Efrîn diyar kir ku îradeya jinên azad êdî ji tevahiya jinên Sûriyeyê re bûye mal û got: “Şoreşa jinan ne tenê parastina jinan kir, her wiha wê bingeha parastina civakê û avakirina welatekî bi edalet, wekhevî û azadî danî.”
Der barê êrişên li dijî jinên Beravê û Siwêdayê de Rohilat Efrîn got: “Ev binpêkirin hewldana qirkirina îradeya jinan û civakê bûn, ji ber wê girîngî heye ku xweparastin were xurtkirin.”
Rohilat Efrîn diyar kir ku YPJ`ê hêzeke leşkerî û fikrî ye û got ku parastin ne tenê leşkerî, her wiha parastina nirx, azadî, edalet û wekheviyê ye.
Têkildarî kiryarên çeteyan li Efrîn, Girê Spî û Serêkaniyê Rohilat Efrîn got: “Ev kiryar teqez dikin ku tunebûna parastinê tê wateya dubarebûna êşan.”
Di dawiya axaftina xwe de Rohilat Efrîn got: “Berxwedan ne bijarde ye, ew şertê hebûnê ye. Her êrişek li dijî jinan gefê li civakê dixwe û derfetê dide me ku em îradeya xwe bi awayekî xurtir nîşan bidin. YPJ`ê her mertalê jinên Sûriyeyê be.”
