Taziye ku ji bo Şaredarê berê yê Amedê Mehdî Zana li Mala Şînê ya Liciyiyan a li navçeya Rezanê hatibû danîn, di roja 3’yan de berdewam kir. Taziye ku ji aliyê siyasetmedara Kurd Leyla Zana ve dihat qebûlkirin, Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari û gelek kesên din serdana wê kirin. Di taziyeyê de dua hatin kirin û wêneyê Mehdî Zana li cihê taziyê hat daliqandin.
Şandeya Meclîsa Federal a Elmanyayê û Partiya Yekitî 90/Kesk ku ji bo hinek hevdîtinan hatibûn Amedê jî serdana taziyê kirin. Endama şandeyê û Parlementera Federal a Partiya Yekİtî 90/Kesk Claudia Roth di derheqê Mehdî Zana de axivî û got: “Min Mehdî di salên 1990’î de nas kir. Nasîna me gelek salan berdewam kir. Me di dadgehan de gelek dem derbas kir. Di serdemên ku Leyla Zana, Orhan Dogan û Ahmet Turk dihatin darizandin de em pê re bûn. Ez hatibûm Amedê ji bo cenazeyê Vedat Aydin. Min Leyla Zana nas kir. Mirovan êşkence dîtibûn, hatibûn kuştin. Mehdî wê demê di girtîgehê de bû. Mehdî Zana kesekî gelekî hêja bû. Hêsirên çavên we hêsirên çavên me ne. Mehdî Zana di van demên dawî de jiyana xwe ji dest da lê belê ew fîgureke gelekî dîrokî ye. Ew ê ji bo me her dem bijî. Mehdî Zana dê tu carî li Elmanyayê neyê jibîrkirin. Tiştên ku wî û Leyla Zana anîne em her dem nîqaş dikin. Mehdî Zana dê her dem di dilê me de bijî.”
Piştî Claudia Rothê Leyla Zana axivî û spasiya xwe diyar kir û got: “Wê di demên teng de her dem hevaltiya xwe nîşan da. Ew dostên Kurdan bûn. Heke gelê Kurd di bin zilme de ma be, ne tenê dewletên li 4 parçeyan li dijî Kurdan neheqî kirin. Hemû cîhan bêdeng ma. Claudia ji vê hêlê ve gelekî hestiyar e. Pirsgirêka Kurd ne tenê pirsgirêka Kurd, Tirk an jî Ereb e. Pirsgirêka cîhanê ye, Kurd li hemû cîhanê belav bûne. Îro heke aramî û aştî bibe, dê gelê me li ser axa xwe be. Em hêvî dikin ku dewleta Elmanyayê ji bo aştiyeke birûmet bibe alîkar. Ev doz doza gelê Kurd e, doza nasname û xwişk-biratiyê ye. Dozeke şexsî nîne.”
Taziye dê piştî mewlûdê, bi dawî bibe.
