Komîsyona Demokrasî, Xwişk-Biratî û Piştevaniya Mîllî karê xwe yê guhdarîkirinê dewam dike. Nêzîkatiya AKP’ê ku têkildarî pêvajoyê gavê neavêje, bi rengekî giran tevdigere, li nava gel dibe sedema fikaran. Şêniyên Amedê li ser mijarê ji ANF’ê re axivîn.
JI BO GELAN FIRSENDEK E
Halîse Badkî anî ziman ku pêvajo ji bo dewletê jî şensekî mezin e û got, “Firsendeke mezin li pêşiya wan heye. Li Rojhilata Navîn şer dewam dike, hevsengî diguhere. Eger Tirkiye ji bo aştiyê guherîn û veguherînê neke wê zerareke mezin bibîne Îro ji aliyê aborî û civakî ve krîzeke cidî heye. Eger vî şensê aştiyê bi kar nîne û rêya xwe diyar neke, krîz wê hîn mezin bibe. Rewşa bi vî rengî stabîl a pêvajo bi kêrî kesî nayê. Aştî yekane rê ye ku bi kêrî gelan tê. Divê dewlet jî êdî qanih bibe. Beriya her tiştî dewlet divê gavê biavêje ku xwe ji vê krîzê derxîne. Wê heta kengî bi vî rengî dewam bike? Divê dewlet van rîsk û krîzan bibîne û li gorî wê gavan biavêje.”
‘DI VÎ ŞERÎ DE KES BI SER NAKEVE’
Necat Yilmaz jî ragihand ku hem gelê Kurd hem jî dewletê di vî şerî de zerar dîtin û got, “Her tişt li pêş çavan e. Di vî şerî de gelê Kurd çiqasî zerar dîtibe dewletê jî bi heman rengî zerar dît. Li pêşiya me mînakeke mezin a Rojhilata Navîn heye. Her kes dibîne ku li Sûriye û Îranê rewş çi ye. Eger dewlet ji aliyê çareseriya pirsgirêka Kurd ve gaveke cidî neavêje, dawiya wê jî wê ji yên din ne cuda be. Di şer de kes bi ser nakeve. Aştî îro ji bo me hemûyan firsendek e, em çawa dixwazin divê ew jî bi heman rengî bixwazin. Ev pirsgirêk divê bi rengekî demokratîk bê çareserkirin. Eger neyê çareserkirin krîza heyî wê hîn giran bibe, şer jî wê dewam bike. Erdogan îro hîn jî li pey dewamkirina desthilatdariya xwe ye, dibîne ku gelê Kurd bi kê re be ew bi ser dikeve, lewma vê siyasetê dimeşîne. Kurd êdî Kurdê berê nîne, Kurdan li hemberî DAÎŞ a herî barbar şer kirin û bi ser ketin. Di nava her şert û mercî de dewlet neçar e ku hin gavan biavêje.”
‘GAVAN NEAVÊJE WÊ WINDA BIKE’
Nezahat Suer jî bal kişand ser daxwaza hevpar a dayikên aştiyê. Suer got, “Em dixwazin ev pêvajo bi aştiyê bi encam bibe. Bila êdî xwîn nerije, kes nemire. Divê ev firsend baş bê bikaranîn. Me gelekî êş kişand; bila êdî kes nekişîne. Em ji bo aştiyê amade ne, divê gel hemû ji bo vê aştiyê amade bin. Eger ev pêvajo bi ser nekeve hem em hem jî ew ê winda bikin. Yekane daxwaza me dayikan ew e ku ev pêvajo bi aştiyê bi encam bibe. Her kes bi rengekî ji rêzê lê temaşe dikin, lê belê ev pêvajo ji rêzê nîne, muzakereya piştî 50 salî ye. Ji ber vê divê her kes bi qîmetê vê bangê û daxwazê zanibe. Aştî yekane rê ye ku bi her kesî bide qezençkirin.”
