Piştî ku di rojên dawî de ajansa Rojnews mijara darbirîn, dizîn û wêrankirina jîngeh û daristanên li Behdînanê eşkere kir, ev çend rojin ku ev mijar li kolanên Herêma Kurdistanê û welatiyan gelek bertek nîşan dide û torên dîjîtal tijî dike.
Dewleta Tirk nêzîkî 10 salane kompanyaya “Cengîz Holdîng” aniye devera Badînan a Başûrê Kurdistanê. Ev kompanya bi awayekî sîstematîk daristanan dibire û daran talan dike; di heman demê de, di nav axa Herêma Kurdistanê de mijûlî çêkirina rêyên leşkerî ye ji bo artêşa Tirk. Ev kompanya xwedî dîrokeke qirêj û dirêje di warê tawanên li dijî gelê Kurd û Kurdistanê de; li Bakur, Başûr û her wiha li Rojavaya Kurdistanê jî her tim di nav dagirkerî û tawanên dewleta Tirk de cih girtiye.
Rojnews ji çend çavkaniyan li herêma Berwarî Bala ya navçeya Amêdiyê ya ser bi parêzgeha Dihokê agahî wergirtiye ku tenê di 10 rojên dawî de, zêdetirî 250 kamyonên mezin ên tijî dar hatine birîn û birin bo Tirkiyeyê.
Hat ragihandin ku gundên ku jîngeh û daristanên wan ji aliyê dewleta Tirk ve hatine talankirin wiha ne; Gundê Mîska, Qumri, Hirûrê, Kêste, Tirwaniş û Nizdûrê yên li herêma Berwari Bala ya bajarokê Amêdiyê ne. Bi taybetî niha li gel nêzîkbûna werza zivistanê ev pêngava birîn, dizîna darên Kurdistanê û talankirina jîngeha wê ji aliyê dewleta Tirk ve hatiye bilezkirin.
Der barê kî daran dibire de, şîrketên ku li Başûrê Kurdistanê rê ji bo artêşa Tirk çêkirine û vekirine hatine zanîn. Ew di bin çavdêriya artêşê de li nêzî baregeha leşkerî ya Girê Biyê dibin Tirkiyeyê.
Derbarê kî daran dibire de; Rojnews hîn bûye ku şîrketên ku li Başûrê Kurdistanê ji bo artêşa Tirk rêyan çêdikin û rêyên hatine girtin ji bo artêşa Tirk vedikinin. Di bin çavdêriya artêşa Tirk vê talana Kurdistanê dikin û dibin nêzîkî baregeha artêşa Tirk a Girê Biyê û ji wê derê jî di Deriyê Serzêrê re derbazî Tirkiyeyê dikin.
Artêşa Tirk û şîrketên tevlî vê talanê dibin bi van karên bazirganî û destkeftiyên madî bênavber zerer û ziyaneke bêhempa dane jîngeh û xwezaya Behdînanê. Lêbelê, saziyên Herêma Kurdistanê û aliyên peywendîdar li hember van binpêkirinên artêş û dewleta Tirk bêdeng mane û ji bo parastina jîngeha Başûrê Kurdistanê tu gavên pratîk ne avêtine.
Ji ber vê yekê, divê hikûmeta Iraqê pêşî zexta dîplomatîk li ser dewleta Tirkiyeyê bike da ku birîna daran rawestîne. Piştre divê Herêma Kurdistanê bêdengiyê bişkîne û jîngeha Başûrê Kurdistanê biparêze.
Divê li ser asta herêmî li dijî birîna daran û wêrankirina jîngehê Başûrê Kurdistanê bi taybet Behdînanê kampanyayek berfireh were destpêkirin; eşîr û niştecihên herêmê destûr nedin wêrankirina welatê xwe. Li ser asta navnetewî, divê rêxistinên jîngehê werin teşwîqkirin ku li dijî kiryarên dewleta Tirkiyeyê zextek navnetewî bafirînin.
