Tevgera Azadiya Jinên Êzidî (TAJÊ), Saziyên Rêveberiya Xweser a Şengalê û malbatên şehîdan, bi munasibeta 8’ê Adarê û ji bo bîranîna şehîdên jin ên di oxira Şengaleke azad û xweser de canê xwe feda kirine, serdana şehîdgeha Şehîd Dilgeş-Şehîd Berxwedan ya li serê çiya yê Şengalê kirin.
Civaka Êzidî û bi taybet jî dayîk û jinên Êzidî hebûna xwe minedarê bi sedan şehîd dibînin û di her munasibetekê de birêzdarî bi bîr tînin û dilsoziya xwe ya bi wan re nû dikin.
Li Şehîdgeha Şehîd Dilgeş-Şehîd Berxwedan a Serdeşta çiyayê Şengalê, bi dehan şehîdên jinên û gerîlayên ji her çar parçeyên Kurdistanê hene. Ev şervan û gerîlayên jin yên di dema fermanê û pêvajoya piştre de di encama êrişên DAÎŞ’ê, PDK’ê û dewleta Tirk de şehîd ketine.
Jinên Êzidî asta îro gihîştinê, destketiyên xwe û azadiya li Şengalê weke berhema ked û fedekariya mezin a şehîdan dibînin. Lewma di her munasibetekê de berî her tiştî şehîdan bi bîr tînin, li peyî jî dest bi minasibetên xwe dikin.
Bi munasibeta 8’ê Adarê Roja Jinên Kedkar ên Cîhanê endamên saziyên Rêveberiya Xweser û malbatên şehîdan serdana şehîdgehê kirin, bi irf û adetên Êzdatiyê ew bi bîr anîn û gul danîn ser gorên şehîdan.
