Endamê Meclîsa Giştî ya Partiya Yekîtiya Demokratîk (PYD) Talat Yûnûs li ser girîngiya yekîtî û hevgirtina gelê Kurd axivî.
Talat Yûnûs got, “Dijminên gelê Kurd ji dîrokê û vir ve ji bo yekîtiya gelê Kurd pêk neyê hewl dan gelê Kurd parçe bikin. Ji bo em karibin li dora berjewendiyên hevpar tevbigerin, divê yekîtiya Kurd pêk bînin. Ji bo em karibin li ser xaka xwe bimînin û hebûna xwe dewam bikin, ji bo karibin li hemberî polîtîkayên qirkirinê bisekinin divê em li seranserê cîhanê xwedî yek nêrîn û yek helwestê bin. Hewldanên dijmin ên ji bo parçekirinê, polîtîkayên dagirkeriyê û têkbirina yekîtî û hevgirtinê li pêşiya bidestxistina mafên gelê Kurd astengiya herî mezin e. Ji ber vê yekê wPYD ji bo pêkanîna yekîtiya Kurdan, bi berjewendî û nêrîna hevpar tevgeriya û ji bo demokrasî, wekhevî û azadiyê gelekî hewl da.”
‘BI DESTÊ DEWLETA TIRK HEVDÎTIN HATIN TÊKBIRIN’
Talat Yûnûs bi bîr xist ku di destpêka Şoreşa Rojava de ji bo pêkanîna yekîtiya Kurdan Konseya Kurd a Bilind hate avakirin û got, “Ji bo avakirina Sûriyeyeke demokratîk û Rojavaya azad, di destpêka şoreşê de me hewl dan yekîtiya gelê Kurd pêk bînin. Ji bo pêşî li polîtîkayên qirkirin û komkujiyê bînin bi partiyên siyasî û saziyên Kurdan re me diyalog danîn. Her wiha em bang li Başûrê Kurdistanê kir ku ji bo yekîtiya Kurd bibe alîkar. Bi ENKS’ê re ji bo kar bê kirin me hewl dan.
Gelê me ji vê yekê kêfxweş bû, lê belê me nekarî encama tê xwestin bi dest bixin. Li gel vê yekê hewldanên me dewam kirin. Ji ber berjewendiyên şexsî yên partiyên siyasî yên Kurd û destwerdana dijminên gelê Kurd encam nehate bidestxistin. Lewma karên Konseya Kurd a Bilind hate rawestandin. Lê belê hewldanên PYD’ê yên ji bo yekîtiyê ti carî nesekinînin. Ji bo bi Kurdên li Rojava re konferanseke hevpar bê lidarxistin, ji bo kongreyeke neteweyî ya ku çar parçeyan digire nava xwe pêk bîne, me hewl dan.
Partiyên siyasî yên ku di bin sîwana PYNK’ê de li hev kom bûn bi pêşengiya Hêzên Sûriyeya Demokratîk û navbeynkariya koalîsyona navneteweyî hewl dan bi ENKS’ê re rûnên. Weke PYNK ji bo pêkanîna yekîtiya Kurd me timî anîn ziman ku em ji nîqaşên bi vî rengî re vekirî ne. Pêkanîna yekîtiya Kurdan ji bo me karê sereke ye; me ti astengî dananîn pêşiya vê daxwazê. Ji ber têkiliya aliyan bi dewleta Tirk û hêzên cuda re me nekarî encamê ji vê hewldanê werbigirin. Weke PYD’ê me pêşengî ji înîsiyatîfeke nû re kir. Partiyên siyasî yên Kurd ên li Sûriyeyê, nêrîna xwe çi dibe bila bibe me hewl dan înîsiyatîfê bi kar bînin û li hev kom bibin. Nêrînên me yên hevpar çi ne, parşeroja Sûriyeyê divê çawa be, em dixwazin Sûriyeyeke çawa ava bikin, me hewl dan ji bo paşeroja gelan pêşnûme û nêrînekê biafirînin. Ev yek ji bo hevdîtinên li Şamê wê gelekî baş be û ev înîsiyatîfa me hîn jî dewam dike. Di vê çarçoveyê de me komxebatek lidar xist û wê dewam jî bike. Armanca me ya esasî pêkanîna yekîtiya gelê Kurd e. Ji bo vê yekîtiyê jî çi ji destê me bê em ê bikin.”
‘KURDAN PÊŞENGÎ JI ŞOREŞÊ RE KIRIN, DIKARIN JI SÛRIYEYA NÛ RE JÎ BIKIN’
Talat Yûnûs diyar kir ku piştî hilweşandina rejîma Sûriyeyê li Sûriyeyê demeke nû destpê kir û got, “Ji bo karibin tevlî avakirina Sûriyeya nû bibin, ji bo parastina mafên gelê Kurd, ji bo misogerkirina mafên xwe di destûra bingehîn a nû de gelekî girîng e ku partiyên siyasî yên Kurd xwedî nêrîneke hevpar bin. Gelekî girîng e ku li Sûriyeya nû em bi fikrekî hevpar tevbigerin. Dem ew dem e ku em bibin yek reng, yek deng, yek kulm. Çawa ku gelê Kurd pêşengî ji Şoreşa Rojava re kirin, ji paşeroja Sûriyeya nû re gelê Kurd dikarin pêşengiyê bikin.
Bêguman ji bo vê jî divê yekîtiya gelê Kurd bê pêkanîn. Bi hemû partiyên siyasî yên di bin sîwana PYNK’ê de ne û hemû partiyên siyasî yên li Herêma Rêveberiya Xweser a Bakur û Rojhilatê Sûriyeyê em xwedî heman nêrînê ne. Di vê çarçoveyê de me bang li ENKS’ê kirin. Me bang li partiyên Kurdistanî hemûyan kirin ku ji bo pêkanîna yekîtiya Kurd bibin alîkar. Bi navbeynkariya Fransa û DYE’yê hewldan dewam dikin. Kar dewam dike ku heyeta biçe Şamê bi fikrekî hevpar tevbigere û gelê Kurd temsîl bike.”
