Xebatkara Heyva Sor a Kurd Sêvê Akbîngol li Marsîlyayê û birayê wê Tekîn Akbîngol li Stenbolê li nexweşxaneyên ku lê tedawî dibûn di navbera çend saetan de di heman rojê de jiyana xwe ji dest dan.
Sêvê Akbîngol a ku salên dirêj bi awayekî xwebexşane weke xebatkara Heyva Sor a Kurd xebitî, li Marsîlyayê aciz bû û ew rakirin nexweşxaneyê. Birayê Sêvê Akbîngol a ku li Marsîlyayê tedawî dibû Tekîn Akbîngol jî ew demek dirêj bû nexweşxaneyeke Stenbolê tedawiya penceşêrê didît. Her du xwişk û bira di nava heman rojê de jiyana xwe ji dest dane.
Birayê her du xwişk û birayên ku li gundê Xinzora ê Gimgim a Mûşê ji dayîk bûne Husamettin Akbîngol jî di nava refên gerîlayan de tevlî karwanê şehîdan bûye. Gelek ferdên ji malbata Akbîngol a welatparêz di nava refên têkoşîna azadiyê de cih digirin. Her wiha xwarzaya wan Nazîfe Akbîngol (Şîlan) jî di nava regên gerîlayan de tevlî karwanê şehîdan bûbû.
Ji ber şert mercên hewayê yên xirab derfet nîne ku cenazeyê her du xwişk û birayan bibin gundê ku lê ji dayîk bûne û wê li Stenbolê li ba hev werin veşartin. Tê payîn ku merasîma cenazeyan sibehî were lidarxistin.
Piştî merasîma cenazeyan wê li Fransa û Elmanyayê konên sersaxiyê werin danîn.
