Cejna Newrozê îsal bi dirûşmeya ‘Rêbertiya Azad, Civaka Demokratîk’ tê pîrozkirin. Her salê bi hezaran kes beşdarî Newroza li Amedê dibin. Ji bo Newroza îsal jî rojek ma.
Şêniyên Amedê yên beşdarî pîrozbahiyan bûne, ji ANF’ê re axivîn.
WÊ RÊYA AŞTIYÊ VEBE
Ferît Algin: Bila Roja me ya herî xirab, weke roja Newrozê be. Ez hêvî dikim ku Newroz bibe wesîleya aştî, edalet, yekîtî û xwişk-biratiyê. Newroza her 4 parçeyên Kurdistanê pîroz be. Ez ji vir Cejna Newrozê li Birêz Ocalan jî pîroz dikim. Wê ji bo Rojhilata Navîn deriyê aştiyê vebe. Ji her kesê re serketin.
ÎSAL DÎROK E
Guler Tekîn: Newroza îsal pir girîng e. Ji çiyayan heta girtîgehan, Newroza hemû hevalên berxwedêr û Rêber Apo pîroz be. Newroza îsal ji bo me dîrokek e. Peyama Rêber Apo pir girîng e. Divê dewlet demildest bersiv bide. Em xwedî li peyama Rêber Apo derdikevin. Aştî yekalî nabe.
EM DIXWAZIN KOMKUJÎ BI DAWÎ BIBIN
Ahmet Mîter: Pîrozbahiyên Newrozê ji bo me bi coş derbas dibin. Ji bo aştî çêbibe, em li qadan e. Em ji bo xwişk-biratiyê li vir in. Em hêvî dikin ku pêvajoya aştiyê erênî dewam bike. Em dixwazin mirin û komkujî bi dawî bibin. Gelê Kurd pir xweş xwedî li peyama Rêbertî derket.
JI BO AŞTIYÊ DIVÊ HER KES BIXEBITE
Meryem Soylu: Newroza îsal gelek cuda ye. Em hêvî dikin wê bibe Newroza aştî û azadiyê. Gelê Kurd 46 sal in têdikoşe û şehîdan dide. Em dixwazin pêvajoya aştiyê, erênî encam bibe. Bila êdî xwîn nerije, dayik negirîn. Divê her kes xwedî li vê pêvajoyê derkeve. Bi taybetî çapemenî divê vê pêvajoyê pir baş ji gelê me re vebêje. Divê gelê me vê pêngava nû pir baş fêm bikin û xwedî lê derkevin. Ji bo aştiyê divê her kes bixebite.
