AMED: Çalakiya“Bila winda bên dîtin, faîl bên darizandin” a ku ji aliyê ÎHD û xizmên windayan ve di sala 2009’an de li Parka Koşuyolu ya Amedê hatî destpêkirin, di hefteya 859’an de dom kir. Xizmên windayan li ber Bîrdariya Mafê Jiyanê ya li Parka Koşuyolu hatin ba hev û wêneyên xizmên xwe yên winda hildan. Di çalakiyê de Emîne Ocak hate bîranîn ku di meha Hezîranê de ji ber nexweşiyê rakirin nexweşxaneyê û 23’yê Tîrmehê jiyana xwe ji dest da. Di çalakiya vê hefteyê de aqûbeta Mehmet Yildiz hate pirsîn ku sala 1994’an hate windakirin. Daxuyanî piştî çalakiya rûniştinê bi dawî bû.
ÊLIH: Şaxa ÎHD’ê ya Êlihê û xizmên windayan di hefteya 695’an a çalakiyê de li ber Bîrdariya Mafên Mirovan a li Cadeya Gulistan hatin ba hev. Nûnerên partiya siyasî û rêxistinên civakî yên sivîl jî beşdarî çalakiyê bûn. Di çalakiyê de wêneyên welatiyên ku di cînayetên sala 1990’î de hatin qetilkirin, hatin hildan. Di çalakiyê de aqûbeta Mehmet Yaşar hate pirsîn ku 31’ê Tîrmeha 1993’yan dema li garaja Mîdyad a li navenda Êlihê ji mînîbusê hate xwarê, hate qetilkirin. Daxuyanî bi çalakiya rûniştinê bi dawî bû.
COLEMÊRG: Xizmên windayan di hefteya 185’an çalakiya xwe de, li Kolana Hunerê ya li navçeya Gever a Colemêrgê hatin ba hev. Di çalakiyê de pankartên “Faîl diyar in, winda li kuderê ne” û “Bila winda bên dîtin, faîl bên darizandin” û wêneyên windayan hatin hildan. Gelek kes beşdarî çalakiyê bûn. Daxuyanî bi çalakiya rûniştinê bi dawî bû.
DERSIM: Şaxa ÎHD’ê ya Dersimê aqûbeta Ayten Ozturk a ku 27’ê Tîrmeha 1992’yan hate qetilkirin, pirsî. Çalakî li Kolana Hunerê hate lidarxistin û gelek kes beşdar bûn.
