AMED: Xizmên Windayan û rêveberên Şaxa ÎHD’ê ya Amedê çalakiya xwe ya “Bila winda bên dîtin kujer bên darizandin” di hefteya 921’emîn de li ber Bîrdariya Mafê Jiyanê ya Parka Koşûyolû ya navçeya Rezan a Amedê li dar xistin. Parazvanên mafên mirovan, endam û rêveberên saziyên sivîl ên civakî û xizmên windayan tevlî çalakiyê bûn. Di çalakiyê de wêneyên kesên hatine windakirin hatin hilgirtin.
ÎHD’ê û xizmên windayan di çalakiya vê hefteyê de aqubeta Vahît Narînê ya ku di 2’yê Cotmeha 1992’yan de li navçeya Pasûrê ya Amedê hatiye windakirin, pirsîn.
Destpêka çalakiyê Sekreterê ÎHD’ê yê Şaxa Amedê Firat Akdenîz da zanîn ku 31 sal in ew ji bo kesên hatine windakirin li ber xwe didin û wiha axivî: “Heya ku aqûbeta windayên me aşkere nebe wê tekoşîna me berdewam bike.” Firat Akdenîz salvegera Qetlîama Vartînîsê jî bi bîr xist û anî ziman ku ew careke din Qetlîama Vartînîsê şermezar dikin.
Piştî Firat Akdenîz, keça Vahît Narîn, Îkram Narîn diyar kir ku bavê wî kesek xurt û welatparêz bû, ji ber vê yekê êrîşî bavê wî hatiye kirin û ew winda kirine. Îkram Narîn got ku divê êdî kujerên bavê wê werin darizandin û aqûbeta bavê wê were zelalkirin.
Piştî Îkram Narîn, çîroka Vahît Narîn ji aliyê Rêveberê ÎHD’ê ya Şaxa Amedê Yahya Polat ve hat xwendin.
Çalakiya vê hefteyê bi deqeyek rêzgirtina ji bo kesên hatine windakirin bi dawî bû.
ÊLIH: Xizmên Windayan û rêveberên Şaxa Komeleya Mafên Mirovan (ÎHD) a Êlihê di hefteya 757’emîn de çalakiya “Bila winda bên dîtin û kujer bên darizandin” li ber Bîrdariya Mafên Mirovan a li ser Cadeya Gulistanê li dar xistin. Di çalakiyê de li aqûbeta Mehmet Zekî Akyildiz ê ku di 15’ê Îlona 1993’yan de dema ji mala xwe ya li gundê Qurtê yê girêdayê navçeya Farqînê ya Amedê derketibû û çûbû mala xwişka xwe û ji wê rojê ve tu agahî jê nehatiye girtin hate pirsîn. Di çalakiyê de rêveber û endamên ÎHD’ê û Xizmên Windayan û gelek kes amade bûn û wêneyên kesên ku di binçavan de hatine kuştin û windakirin hildan. Çîroka windabûna Mehmet Zekî Akyildiz ji aliyê Rêveberê ÎHD’a Êlihê Metîn Nas ve hate xwend.
Çalakiya xizmên windayan û ya ÎHD’ê bi deqîqeyekê çalakiya rûniştinê bi dawî bû.
COLEMÊRG: Şaxa Komeleya Mafên Mirovan (ÎHD) a Colemêrgê û Xizmên Windayan çalakiya “Bila winda bên dîtin, kujer bên darizandin.” di hefteya 247’an de li Kolana Hunerê ya Geverê li dar xistin. Parêzvanên mafên mirovan û malbatên windayan vê hefteyê aqûbeta Mecît Baskin ê ku 30’ê îlona 1993’an de li Enqereyê hatibû kuştin pirsîn.
Daxuyanî ji aliyê hevserokê ÎHD’ê yê Colemêrgê Ozan Akbaş ve hate xwendin. Di daxuyaniyê de hat ragihandin ku ev 33 sal in kujerên Mecît Baskin nehatine darizandin.
Piştî daxuyaniyê kurê Macît Baskin Eren Baskin da zanîn ku ji zarokatiya xwe ve ew li pey kujerên bavê xwe ye û diyar kir ku tevî hemû delîlan jî ji kujeran hesap nehatiye pirsîn.
Daxuyanî bi çalakiya rûniştinê bi dawî bû.
