Fermandariya YBŞ’ê bi daxuyaniyekê şehîd Seîd Hesen û şehîd Îsa Xwedêda bi bîr anî.
Daxuyaniya YBŞ’ê bi vî rengî ye:
“16’ê Tebaxê di pêncemîn salvegera şehadeta fermandarê Yekîneyên Berxwedana Şengalê Seîd Hesen, biraziyê wî û hevalê wî Îsa Xwedêda de wan bi bîr tînin. Ew di 16’ê Tebaxa 2021’an de dema ku wesayîta wan li navenda Şengalê bû, rastî êrîşeke hewayî ya ji aliyê dewleta Tirk a dagirker ve hatin û di encam de şehîd ketin.
Şehîd Seîd Hesen yek ji pêşengên herî berbiçav ên berxwedana Êzidiyan û yek ji damezrînerên Yekîneyên Berxwedana Şengalê bû. Ew di nav gelê xwe de bi wêrekî, dilnizmî, dilsozî û fedakariya xwe ve dihat nasîn. Piştî ku çeteyên DAÎŞ’ê di 3’ê Tebaxa 2014’an de êrîşî Şengal kir, Seîd Hesen digel endamên malbat û eşîra xwe, tevlî berxwedanê bû. Wî hilbijart ku li Çiyayê Şengalê bimîne da ku gelê xwe û hebûna wan biparêze, di berxwedana li dijî çeteyên DAÎŞ’ê û azadkirina herêma Şengalê de roleke girîng lîst.
Heval û cangorî Seîd Hesen xwedî wê baweriyê bû, ku hêza Êzidiyan di yekîtiya wan de ye. Wî bi berdewamî banga yekkirina rêzan û yekkirina hewildan û biryarên Êzîdiyan kir, dabeşbûn û nakokiyên ku di demên cûda de gelê me qels kirine, dan aliyekî.
Cangorî Îsa Xwedêda, biraziyê wî û hevalê wî, xwedî heman taybetmendiyên wêrekî, dilsozî û fedakariyê bû. Ew li kêleka mamê xwe di rêya berxwedan û parastina gelê xwe de meşiya.
Armanckirina her du pêşengên me, ne tenê êrîşek li ser du kesan bû, êrîşek li ser yek ji sembolên herî berbiçav ên berxwedana Êzidiyan bû, ku ji xaçerêya qirkirinê çêbû. Ew êrîşek li ser îradeya gelekî bû ku, ev rê hilbijart ku li hember çeteyên DAÎŞ’ê li ber xwe bide û ax û hebûna xwe bi xwîna zarokên xwe biparêze. Bi şehîdbûna wan, Êzidiyan du rêberên xwe yên herî hêja winda kirin, lê mîrat, helwest û qurbaniyên wan dê di bîranîna berxwedanê de bimînin.
Di vê salvegerê de, em piştrast dikin ku xwîna cangoriyên me dê ne tenê hejmarek di salnameyên dîrokê de be û qurbaniyên ku ji bo parastina Şengalê, rûmeta Êzidiyan û mafê wan ê parastina hebûna xwe hatine dayîn dê neyên jibîrkirin.
Em weke Yekîneyên Berxwedana Şengalê (YBŞ), dema ku em cangoriyên xwe Seîd Hesen û Îsa Xwedêda bi bîr tînin, soz didin cangoriyan û gelê xwe ku em ê dilsozê rêya ku wan hilbijartiye bimînin, destkeftiyên berxwedanê biparêzin, yekîtî û rûmeta Êzidiyan biparêzin û mafê wan ê parastina ax û hebûna xwe biparêzin. Em ê di peyman û rêka ku cangoriyên me bi xwîna xwe çêkirine de bi israr bimînin.”
