Li Tirkiye û Kurdistanê krîza aboriyê mercên jiyanê yên çîna karker her roj hîn giran dike. Mûçeyên ku li pêşberî enflasyona bilind dihele û maliyeta zêede ya jiyanê pirsgirêkên debarê yên kedkaran mezin dike. Her wiha zexta zêde ya li kargehan, bêewlehî û binpêkirina mafan jî balê dikişîne. Ber bi 1’ê Gulanê ve karker daxwazên xwe yên li ser mûçeyekî adil, karê ewle û jiyaneke mirovane bêhtir tînin ziman.
Endamê Desteya Rêveberiya Navendî ya Partiya Kedê Ûmût Yegîn li ser pirsgirêkên karker û kedkaran ji ajansa me re axivî.
‘DENGÊ KARKERAN BI RÊXISTINÎ XURT DIBE’
Yegîn destnîşan kir ku dîtina daxwazên çîna karker pêwendiya xwe yekser bi rêxistiniyê heye û got, “Lewma li Kurdistanê û Tirkiyeyê çîna karker û kedkar çiqasî bi rêxistin bin, ev yek wê ji bo bihîstina dengê wan girîng be.”
‘DAXWAZÊN KARKERÊN KURD BI CIH NAYÊN ANÎN’
Yegîn anî ziman ku kedkarên Kurd ne tenê bi daxwazên aboriyê her wiha bi daxwazên xwe yê li ser maf û nasnameyê jî têdikoşin û li ser pêvajoya li meclîsê bi vî rengî axivî: “Li meclîsê pêvajoyek heye ku nêzî sal û nîvek e dewam dike. Aliyên pêvajoyê dem bi dem navê cuda lê bikin jî pêvajoyek heye. Li meclîsê komîsyonek ava bû. Raporek hate weşandin. Ev rapor ji bo me, ji bo kedkarên Kurd ne di wê astê de ye ku bersivê bide daxwazên me.
Li Gabar a Şirnexê niha petrol tê derxistin û li wê derê şîrketeke hevpar a sermayeya biyanî ya Ereb-Emerîkayê 16 karker ji kar derxist. Ew karker li ber mercên kar û mûçeyê li wê derê rabûn, bûn sendîkayî û ji ber vê yekê jî ji kar hatin dûrxistin.”
‘FATÛREYA KRÎZÊ LI KARKERAN TÊ BIRÎN’
Yegîn ragihand ku barê krîza aboriyê li pişta karkeran tê kirin û ev nirxandin kir: “Rewşeke bi vî rengî heye; 1’ê Gulana 2026’an, 1’ê Gulanê Roja Piştevanî, Têkoşîn û Yekîtiyê ya Navneteweyî ji bo karkerên li welêt di atmosfereke welê de tê pêşwazîkirin ku şer diqewime. Bi bandora vî şerî mercên mêtingeriyê hîn giran bûye. Di atmosfereke bi vî rengî de em nêzî 1’ê Gulanê dibin.
Lewma em dikarin vê bibêjin: ‘Roja Piştevanî, Têkoşîn û Yekîtiyê ya Navneteweyî ya îsal wê ji bo karkeran bibe rojeke ku ji bo cîhaneke dûrî ji mêtingerî û bê şer li hev kom bibin.”
‘1’Ê GULANÊ LI QADAN BIN’
Ûmût Yegîn herî dawî ev bang li karkeran kir: “Em bang li kedkarên Kurd û hemû kedkarên li welêt dikin ku 1’ê Gulanê li qadan bin. Bêguman tenê bi tevlîbûna li mîtînga 1’ê Gulanê nabe. Divê li kargehan, li kolanan, li taxan û li dibistanan li dora van daxwazên xwe bibin yek û têkoşînê mezin bikin.”
