YJK-E’yê di daxuyaniya xwe de got, “Em li festîvalê îrade û hêza rêxistinî ya jinan hîn bilind bikin.”
Di daxuyaniyê de hate ragihandin ku jin li çar aliyên cîhanê li hemberî şer, metingerî, sîstema bi serweriya mêr, komkujiyên jinan û her cûre newekheviyê têkoşînê dewam dikin û hate gotin, “Mejiyê bi serweriya mêr ku li her qada jiyanê keda jinê ji nedîtî ve tê, îradeya wê tine dihesibîne îro jî bi şêweyên cuda dewam dike. Li hemberî vê yekê jin têkoşîna xwe ya ji bo azadî, wekhevî û edaletê mezin dikin û berxwedana xwe bi biryardariyê dewam dikin.
Meşa azadiyê ya jinê ku beriya 52 salan di nava Têkoşîna Azadiyê ya Kurd de şîn bû, îro veguheriye tevgereke civakî ya xurt ku xwe digihîne jiyana bi milyonan jinan. Jinan bi şikandina zincîrên koletiyê bûn hêmana esasî ya jiyanê, bi rêxistinî, ked û têkoşîna xwe nîşan dan ku jiyaneke azad pêkan e.
Îro di avakirina civaka demokratîk de pêşengiya jinê xwedî girîngiyeke dîrokî ye. Eşkere ye ku heta jin azad nebe civak azad nabe, edalet, aştî û wekheviya rasteqîn pêk nayê.
Lewma têkoşîna rêxistinbûyî ya jinan ne tenê ji bo jinan ji bo tevahiya civakê hêza bingehîn a azadbûnê ye.
Fedakarî, wêrekî û îradeya azad a ku di şexsê hevrê Zîlan de şênber bû, îro di nava berxwedana jinan de dewam dike. Ruhê wê yê têkoşînê ronahiyê dide lêgerîna jinan a li jiyana azad.
Festîvala Çandê ya Jinan a Zîlan ku îsal wê cara 20’emîn bê lidarxistin, wê bibe zemîneke girîng ku berxwedan, ked, çand û hêza rêxistinî ya jinan bigihîne hev. Festîvala me qadeke xurt a kombûnê ye ku jin dengê xwe lê bilind dikin, tecrûbeyên xwe parve dikin, piştevaniyê mezin dikin û jiyana azad bi hev re ava dikin.
Di festîvala xwe de ku em ê 20’ê Hezîranê li Dortmundê lidar bixin, li dijî kuştina jinan, xizanî mêtingerî, nijadperestî û faşîzmê em ê têkoşîna xwe ya hevpar hîn mezin bikin. Ji bo têkoşîna azadiya jinê hîn bi pêş ve bibe, ji bo rola xwe ya pêşeng a di avakirina civaka demokratîk de xurt bikin, ji bo siberojên azad em ê li hev kom bibin.
Bi vê wesîeyê em bang li jinan hemûyan ên li Elmanya, Hollanda û Belçîkayê dimînin, bi taybetî jî bang li jinên ciwan, dayik û dostan dikin ku beşdarî Festîvala Çandê ya Jinan a Zîlan a 20’emîn bibin.
Werin em bi hev re piştevaniya jinê mezin bikin.
Werin em bi hev re jiyana azad bihûnin.
Werin em bi hev re îradeya jinê û hêza wê ya rêxistinî hîn bilind bikin.
Em di 20’ê Hezîranê de li Dortmundê bicivin!
HIŞYARÎ
Hişyariyên ji bo Festîvala Jinan a Zîlan a 20’emîn:
Em ji gelê xwe rica dikin; Kêr, şûşe, parfum, madeyên jêkirin û şewitînê, çenteyê mezin ê piştê, kursî û droneyan nînin. Di kontrola li ber derî de ev alav wê bêne komkirin. Ji bo festîvala me bi rengekî ewle derbas bibe divê her kes baldar be, di heman demê de çopên xwe bixin bîdonên çopê yên li qada Festîvalê.
BALDARÎ: Ji bo wesayit neyên kişandin û bi ewle bin, li navnîşanên li jêrê hatine diyarkirin dikare bê parkkirin. (Parkên li dora qada çalakiyê hatine kirêkirin.)
Navnîşana Parkê ji bo Otobusan: E3
Navnîşana Parkê ya Wesayitan D1:
Joseph-Scherer-Str. / 44139 Dortmund
Navnîşana Parkê ji bo Wesayitan D2:
Maurice- Vast- Str. / 44139
Bi rêya Tren û U-Bahnê:
Dema li Hauptbahnhof a Dortmundê peya bû, di ser U45 re li Reymdammê divê siwar bibin û yekser derbasî qadê bibin. U-Bahn her 10 deqeyan diçe û tê.
