Navenda Ragihandina Yekîneyên Parastina Gel (YPG) bi daxuyaniyekê nasnameyên 2 şervanên şehîd Şoreş Andok û Têkoşer Amed eşkere kir.
Berfirehiya daxuyaniyê wiha ye:
“Şoreşa Rojava, şoreşeke gel e ku bi bedelên giran hatiye afirandin. Ji çar beşên Kurdistanê jin û xortên çeleng beşdarî têkoşîna li Rojava bûn.
Hevalê Şoreş û Hevalê Têkoşer jî di sal û cihên cûda de beşdarî têkoşîna azadiya Kurdistanê bûne û di Şoreşa Rojava de pêşengiya gelê xwe kirine. Hevalê Têkoşer di encama nexweşiyê û hevalê Şoreş jî di encama qezayekê de, di dîrok û cihên cûda de gihaştine şehadetê.
Ji ber şehadeta hevalên xwe, em sersaxiyê ji gelê xwe yê welatparêz ê Kurdistanê û ji herdû malbatên xwe re dixwazin.
Hevalê Têkoşer Amed, li Amedê jidayik bûye û ji eşîra Omeriyan e. Salên dirêj di nav ciwanên şoreşger de xebatan dimeşîne. Ji ber vê jî 5 caran tê binçavkirin. Tevî komek hevalên xwe li ser navê ‘Mertalên Zindî’ di sala 2005’an de tevlî Tevgera Azadiyê dibe. Bi salan li çiyayên Kurdistanê tê dikoşe û ji lingê xwe ve birîndar dibe. Bi êrişên DAIŞ’ê yên bi ser gelê Rojava de, di sala 2014’an berê xwe dide Rojava û ji destpêka şerê Kobanê heta rizgarkirina gundewarên Kobanê di pêngavan de dimîne û pêşengiya şer dike. Hevalê Têkoşer Amed, li cihê lê dima pir dihat hezkirin, şerker bû, bi her hevalekî/ê re li hev dikir û xwedî sekneke rêxistinî ya gihaştî bû. Bi coş û moral li seranserê herêmên Rojava û Bakur-Rojhilatê Suriyê xebatan meşandiye. Gelê me yê Efrînê piştî sala 2018’an ji cih û warê xwe koçber bûn. Hevalê Têkoşer, li Helebê salên dirêj di nav xebatên parastina gelê me yê Efrînê de cih girt.
Hevalê Şoreş Andok, bi eslê xwe ji Mûşê û ji eşîra Xî’ye. Lê ji ber zordariya dewleta Tirk, malbat koçî bajarê Mêrsînê yê Tirkiyê bûye û hevalê Şoreş li vî bajarî ji dayik dibe. Bi gotinê Hevalê Şoreş; ‘‘hatin û bê sewal û pirs gundê me şewitandin, xaniyên me xerakirin û li ber çavên min li dayika min dan. Dayika min xistin binçavan. Min ev yekê qet qebûl nekir û ev mijar bû sedema min a herî mezin a têkoşînê.’’ Hevalê Şoreş herçiqas li xerîbiyê mezin bûbe jî kok, dîrok û zilma ku li ser malbat û gelê wî hatiye sepandin jibîr nekir û di sala 2015’an de tevlî Tevgera Azadiyê dibe. Bi êrîşên DAIŞ’ê ya bi ser gelê Rojava de berê xwe dide Rojava û li Kobanê di pêngavên şikandina DAIŞ’ê de cih digire. Beşdarî pêngavên; Girê Spî, Bendeva Tişrîn, Minbic, Tebqa, Reqa û Berxwedana Serdemê dibe û di şerê Minbicê de ji lingê xwe birîndar dibe. Hevalê me Şoreş Andok, salên dirêj li Helebê di nav xebatên parastina gel de xebatan dimeşîne.
Herdû hevalên me, di dema li ser kar û xebatên xwe yên li Helebê bûn de, Hevalê Têkoşer Amed ji ber nexweşiyê û Hevalê Şoreş jî di encama qezayekê de şehîd bûn.
Em herdû şehîdên xwe bi rêz û minetdarî bibîr tînin. Di serî de ji gelê xwe yê welatparêz û ji herdû malbatên xwe yên hêja re sersaxiyê dixwazin.”
