Dewleta Tirk a dagirker û çeteyên Artêşa Millî ya Sûriyeyê (SMO) êrîşên xwe yên li ser Bakur û Rojhilatê Sûriyeyê bi rengekî bê navber didomînin. Li dijî êrîşên ku di 8’ê Kanûna 2024’an de li ser Bendava Tişrînê dan destpêkirin, şervanên YPJ’ê û QSD’ê bi rengekî bê hempa li ber xwe didin. Şervanên YPJ’ê 8’ê Adarê Roja Jinên Kedkar ên Cîhanê bi coşeke mezin pêşwazî dikin. Şervanên YPJ’ê Sosin Bîrhat û Zinarîn Firat li Bendava Tişrînê 8’ê Adarê Roja Jinên Kedkar ên Cîhanê pîroz kirin.
LI JINÊN BERXWEDÊR PÎROZ BE
Sosin Bîrhat di çeperên berxwedanê yên Tişrînê de 8’ê Adarê pîroz dike. Sosin Bîrhat wiha got: “Em ê bi hemû jinên berxwedêr re 8’ê Adarê bikin roja têkçûna dagirkerî û faşîzmê. Weke şervaneke YPJ’ê ez vê rojê li hemû şervan û jinan pîroz dikim.”
Sosin Bîrhat destnîşan kir ku ew ê hemû rojan bi ruhê berxwedanê yê jinan pêşwazî bikin û axaftina xwe wiha qedand: “Şervanên YPJ’ê bi ruhekî wêrek û şoreşger di çeperên pêş ên berxwedanê de şer dikin. Ji ber ku Şoreşa Jinê di bin gefeke mezin de ye. Ji bo parastina şoreşê em canê xwe bikin sîber. Bi baweriya mezin a ji serketinê re, em 8’ê Adarê bi wate dikin.”
‘BILA LI RÊBER APO PÎROZ BE’
Ji şervanên YPJ’ê Zinarîn Firat jî ev tişt got: “Em ê bi berxwedana Tişrînê 8’ê Adarê veguherînin roja azadiya hemû jinan. Bi saya keda Rêber Apo berxwedana me gihişte vê rojê. Vê berxwedanê kesayeta têkoşer a jinan derxist holê. Lewma Roja Jinan li Rêber Apo pîroz be. Weke şervanên YPJ’ê em ê xwedî li dîroka têkoşîna jinê, proje û keda Rêber Apo derkevin.”
