Yekîneyên Parastina Rojhilatê Kurdistanê (YRK), bi boneya salvegera Şoreşa 19’ê Tîrmehê daxuyaniyek nivîskî weşand. YRK’ê, di daxuyaniya xwe de hemû şehîdên şoreşê û di şexsê wan de Fermandarê pêşeng Şehîd Simko Kobanê bi hurmetî bi bîr anî û soza bilindkirina têkoşînê nû kir.
‘SEKNA SIMKO KOBANÊ BERSIVA RADÎKAL A LI DIJÎ DAGIRKERIYÊ BÛ’
YRK’ê, bal kişand ser wateya tevlîbûna Şehîd Simko Kobanê û diyar kir ku wî sekna civaka Rojhilatê Kurdistanê ya li hemberî êrîşên li ser Rojava bi tevlîbûna xwe tacîdar kiriye. Di daxuyaniyê de hat destnîşankirin ku Şehîd Simko li dijî êrîşên li ser Kobanê helwesta herî radîkal nîşan daye, berê xwe daye refên azadiyê û navê xwe kiriye Simko Kobanê.
‘JI DESTPÊKÊ HETA ŞEHADETÊ BI HEQÎQETA APOYÎ JIYA’
YRK’ê got, “Ji pêngava xwe ya destpêkê heta roja xwe ya şehadetê, her tim xwest bi wateya heqîqetê Apoyî bijî, şoreşgerî bike û bi seknekî dîrokî li hember dijmin şer bike. Ji bo xwe di felsefe û bîrdoziya Rêber Apo de ava bike û di rastiya şehîdan de bijî, sekin û daxwaza herî bi hêz nîşan da.”
NÛNERIYA JIYANA APOYÎ Û ŞERÊ GEL Ê ŞOREŞGERÎ KIR
Di berdewamiya daxuyaniyê de, hate diyarkirin ku Şehîd Simko bi kesayeta xwe ya piralî nûnertiya hemû aliyên jiyana Apoyî kiriye û bûye mînak û şopdarên Egîdan. YRK’ê, ragihand ku wî di xeta fedayîbûnê de berpirsyariyên mezin girtine ser milê xwe û wiha pê de çû: “Ji bo ku bi erk û berpirsyariyên gerîlayê azadiya Kurdistanê rabe û bibe yek ji pêşengên Şerê Gel ê Şoreşgerî, xwedî lêhûrbûnek kûr û têkoşînek dijwar bû. Sekn û pêşengiya ku wî pêş xist, dê ji bo me bibe bingeha têkoşîna azadiyê.”
YRK’ê, daxuyaniya xwe bi van gotinan bi dawî kir: “Em di şexsê Şehîd Simko de hemû şehîdên meha Tîrmehê û şehîdên Şoreşa 19’ê Tîrmehê bi bîr tînin. Seresaxiyê ji malbata hevrêyê xwe re dixwazin û diyar dikin ku em ê her tim di şopa Simkoyan de bimeşin û meşaleya têkoşîna şehîdên xwe bi biryardarî bilind bikin.”
