Li gorî agahiyên ku AFP’ê ragihandine, li kampa Holê ya ku mezintirîn kampa malbatên DAIŞ’î lê girtî bûn, nêzî 24 hezar kes hebûn. Ji van nêzî 6 hezar û 300 kes, jin û zarokên biyanî bûn ku di beşa bi ewlehiya bilind a bi navêBeşa Pêvek (Annex) de dihatin girtin.
Ji ber êrişan, Hêzên Sûriyeya Demokratîk (HSD) di 20’ê Rêbendanê de neçar mabû ku ji kampê vekişe. Roja din hêzên Şamê ketin kampê. Çavkaniyekî nenas ji AFP’ê re axivî û got: “Ji şemiyê ve di Beşa Pêvek de ji bîst malbatan zêdetir kes nemane.” Her wiha berpirsekî saziyeke alîkariyê ya mirovî jî piştrast kir ku qada navborî hema hema bi tevahî vala bûye.
Hate diyarkirin ku li kampê malbatên ji 42 neteweyên cuda hebûn û bi taybetî gelek jin û zarokên ji Rûsya, Kafkasya û Asyaya Navîn lê diman. Hate destnîşankirin ku piraniya welatên van kesan, vegera wan a bo welat red kiribû.
VEGUHESTINA VEŞARTÎ
Şahidekî ku ji AFP’ê re axivî, diyar kir ku piştî hêzên hikûmetê kontrol girtine dest, wî dîtiye ku kesên çekdar jinên rûpêçkirî bi siwareyan ji kampê derxistine. Rayedaran derbarê mijarê de daxuyaniyeke fermî neda, lê çavkaniyekî ji rêveberiya kampê diyar kir ku xebatên hejmartinê berdewam dikin.
Di dîmenên ku AFP’ê lêkolîn kirine de hate dîtin ku beşa bazarê ya kampê, ya ku normalî qerebalix e, bi piranî vala ye.
Çavkaniyên mirovî ragihandin ku hinek malbat derbasî beşa Sûrî û Iraqiyan a kampê bûne, hinek jî dibe ku bi dizî ber bi Idlib û parêzgehên din ên Sûriyeyê ve hatibin veguhestin.
Li gorî AFP’ê, dema ku hêzên Kurd kontrola kampa Roj didomînin, DYA’yê heta niha zêdetirî 4 hezar û 500 girtî veguhastine Iraqê. Tê armanckirin ku bi giştî 7 hezar kes ji bo Iraqê bên şandin.
