Helbesta helbestvan û romannivîsa kurd Yildiz Çakara bi navê “Mohra Reş” di Festîvala Helbestê ya Femînîst a Julia Viveyê ya li bajarê Philadelphia yê DYE’yê hat lidarxistin de xelata “Mansiyona Taybet a Navneteweyî” wergirt. Xelat, di kategoriya “Helbest, Bîr û Berxwedan” de hat dayîn. Ji ber ku Çakar mijarên têkoşîna jinan, bîra kolektîf û berxwedanê bi zimanekî edebî yê resen hûnandiye hêjayî xelatê hat dîtin.
Festîvala Helbestê ya Femînîst a Julia Viveyê ku ji aliyê Navenda Jinan a Madre Tierra (CIMMT) ve tê organîzekirin wê di 13’ê Mijdarê de li Navenda Çandê ya Taller Puertorriqueñoyê ya li Philadelphiayê bê lidarxistin. Ji deverên cuda yên cîhanê 100 helbestvan beşdarî festîvalê dibin. Helbesta Yildiz Çakar a bi navê “Mohra Reş” (The Dark Seal) di kategoriya “Helbest, Bîr û Berxwedan” de hêjayî xelata “Mansiyona Taybet a Navneteweyî” hat dîtin.
Komîteya xelatê bi nameyeke taybet biryara xwe ji Yildiz Çakar re ragihand. Di nameyê de bal hat kişandin ser hêza wêjeyî ya helbestvanê û hat destnîşankirin ku wê mijarên wekî tundiya li ser jinan, cînayetên jinan, bîra kolektîf, ax, windabûn û berxwedana jinan bi perspektîfeke resen a Kurdî girtiye dest.
Di nameyê de hat diyarkirin ku helbesta Çakar asoya wêjeyî ya festîvalê ji Emerîkaya Latîn û Karayîban wêdetir biriye û gihandiye asteke cîhanî û hat gotin ku berhemê bi têkoşîna azadî û rûmetê ya jinan re pireke xurt ava kiriye.
Ji ber ku Yildiz Çakar li derveyî DYE’yê dijî, helbest wê di merasîma fermî de bi rêya dîtbarî bigihîje hezkiriyên edebiyatê.
