Alexis Tsipras, ragihand ku ew ê bi avakirina partiyeke nû ya siyasî re vegere siyasetê. Serokwezîrê berê yê Yewnanîstanê, diyar kir ku ew ê di 26’ê Gulanê de damezrandina xwe ya nû ragihîne.
Tsipras, di vîdyoyekê de ku li ser hesabê xwe yê medyaya civakî weşand, peyama “Niha dem hatiye” parve kir. Wî navê partiya xwe ya nû eşkere nekir.
SEROKWEZÎRÊ DEMA KRÎZÊ BÛ
Tsipras, di sala 2015’an de wekî serokê partiya Syriza di dema krîza aborî de bû Serokwezîr. Tevî ku li dijî polîtîkayên teserûfê bû jî, di bin zexta Yekîtiya Ewropayê de neçar ma ku bi tedbîrên aborî yên giran re berdewam bike.
Piştî ku Tsipras di hilbijartinên 2019’an de li hember Kyriakos Mitsotakis desthilatdarî winda kir, di sala 2023’yan de piştî têkçûna giran a Syriza ji serokatiya partiyê îstifa kir. Paşê Tsipras ji kursiya xwe ya meclîsê jî îstifa kir.
REXNEYÊN LI HIKÛMETÊ ZÊDE DIBIN
Hewldanên avakirina partiya nû, di demeke ku rexneyên giran li ser Hikûmeta Demokratîk a Nû ya li Yewnanîstanê de zêde dibin, hat. Bihabûna jiyanê, îdiayên gendeliyê û skandalên guhdarîkirina telefonan li welêt hin ji mijarên ku hikûmetê dixe zehmetiyan.
Tevî hemû nîqaşan jî, partiya Demokratîk a Nû ya desthilatdar hîn jî di anketên raya giştî de li pêş e.
