Civîna gel ji aliyê Platforma Saziyên Demokratîk ve li saloneke navçeya Şehîtkamîl a Dîlokê hate organîzekirin. Çetin Arkaş, ji Tevgera Jinên Azad (TJA) Ayla Akat Ata û endama Buroya Hiqûqê ya Asrînê Raziye Ozturk beşdarî civînê bûn. Di tevahiya civînê de dirûşmên “Bijî Serok Apo”, “Silav, silav hezar silav ji Îmraliyê re”, “Jin, jiyan, azadî” û “Bijî berxwedana zindanan” hatin gotin.
RAZİYE OZTURK: DI RÊVEBERIYA PÊVAJOYÊ DE DIVÊ ALÎ WEKHEV BIN
Endama Buroya Hiqûqê ya Asrînê Raziye Ozturk, di axaftina xwe de silavên Rêber Apo ragihand û got, “Abdullah Ocalan rêberek e ku di Kurdan de teyîsîneke xwe a kolektîf nîşan dide. Ji ber vê yekê, di rêveberiya vê pêvajoyê de jî divê alî di şert û mercên wekhev de bin.” Raziye Ozturk wiha lê zêde kir: “Ji ber vê yekê em girîngiyê didin azadiya fizîkî ya Birêz Ocalan û xebata wî di şert û mercên azad de. Yanî çawa aliyê dewletê dikare bi her kesî re bişêwire û bicive, divê Birêz Ocalan jî bikare bi muxatabên din re bicive û bigihîje wan.”
AYLA AKAT ATA: HÊVÎ EM IN
Endama TJA’yê Ayla Akat Ata gotina “Rêberê Gelê Kurd Abdullah Ocalan ji sala 1993’an ve di nava pêvajoyê de ye” dest bi axaftina xwe kir û wiha domand: “Wî ev hevdîtin bi dewletê re kir, nirxand, encamên wê dizane û vîna ku ji deklarasyona 27’ê Sibatê heta îro anî holê, agahiya tevahiya vê pêvajoya heyî ye. Serok bi vê agahiyê tevdigere. Wê demê divê em jî li gorî vê agahiyê rêxistinbûyînê derxin holê.”
Ayla Akat Ata bal kişand ser civînên gel ên piştî banga Rêber Apo ya 27’ê Sibatê û got, “Eger em behsa çareseriya demokratîk, avakirina civakeke demokratîk û aştiyê dikin, wê demê em ê gotinên wî bînin ziman.” Ayla Akat Ata wiha berdewam kir: “Em ê bi xwe bawer bikin. Hêvî di me de ye, hêvî em in. Hêvî tam jî gelê me ye ku îro ev salona dagirtiye.”
ARKAŞ: HINEK TIŞT DIVÊ BÊ GUHERTIN
Çetin Arkaş jî bal kişand ser pêwîstiya misogerkirina azadiya fizîkî ya Rêber Apo ku muxatabê sereke yê pêvajoyê ye û baştirkirina şertên xebatê yên wî. Arkaş ev tişt anî ziman: “Rêber Apo mirovekî ku di şertên herî zehmet de tiştên ku jê bawer dike tîne ziman. Zanyariya dîrokê ya wî pir xurt e, mirovekî zana ye ku pir baş dizane ew çi dike. Bi baweriyeke mezin ez vê dibêjim: Abdullah Ocalan ne yê ku bixapîne û ne jî yê ku were xapandin e. Me ev yek di dîrokê de gelek caran dît û tecrûbe kir. Eger têgihiştineke ku Kurdan wekî hebûn û rûmeta gelekî bibîne pêş bikeve, em amade ne ku hembêza xwe vekin. Em ê rabirdûyê ji bo kînê, lê ji bo ku careke din neyê jiyîn, ji bîr nekin. Behsa entegrasyonê ji me re tê kirin, lê tayînkirina qeyûman berdewam dike, hevalên me di girtîgehan de dîl in, tecrîda li ser giravê ranebûye. Hinek tişt divê bê guhertin. Têkiliyên Kurd û Tirk di sedsala dawîn de xirab û bi pirsgirêk e. Êşên çandî, zirarên aborî hatin jiyîn. Heke em hev nas bikin, em dikarin aştiyê bînin.
‘EM Ê BI HEV FAMKIRINÊ AŞTIYÊ BÎNIN’
Arkaş destnîşan kir ku di dema şer de hem Kurdan hem jî Tirkan gelek windahî jiyan û got, ji bo ku êdî ev windahî çênebin pêwîst e aştî bê pêkanîn. Çetin Arkaş got, “Em ê bi hev famkirinê aştiyê bînin, û bi ferzkirinên yekalî ev kar naçe cihekî saxlem. Em dixwazin vê yekê bi taybetî careke din bînin ziman. Divê her du alî jî bi rastiyan re rû bi rû bimînin.”
Civîn bi bersivdana pirsên welatiyan bi dawî bû.
