Platforma Saziyan a Demokratîk di çarçoveya Civînên Aştî û Civaka Demokratîk de li navçeya Sûr a Amedê civîna gel lidar xist.
Li gel nûnerên partiyên siyasî û rêxistinên civakî yên sivîl bi hezaran kes tevlî civînê bûn. Di civînê de wêneyê Rêber Apo hate dailqandin û pankarta bi nivîsa “Hebûna neteweyî hate naskirin, niha dora rizgariyê ye” hate vekirin.
Çetîn Arkaş, ji Tevgera Jinên Azad Ayla Akat Ata û ji parêzerên Buroya Hiqûqê ya Sedsalê Raziye Ozturk weke axaftvan beşdarî civînê bûn û bi dirûşm û çepikan hatin pêşwazîkirin.
Raziye Ozturk destpêkê axivî û anî ziman ku beriya niha bi komployê bersiv ji lêgerînên çareseriyê yên Rêber Apo re hate dayin, hate xwestin ku têkiliya wî ya bi civakê re bê birîn, lê belê nekarîn vê yekê bi ser bixînin.
Raziye Ozturk anî ziman ku ji bo pêvajoya aştiyê bi rengekî çêker û erênî bimeşe divê “Mafê Hêviyê” bi cih bê anîn û diyar kir ku di mîtînga “Hêvî û Azadiyê” de ya 4’ê Çileyê wê ev daxwaz bê bilêvkirin.
Ayla Akat Ata jî destnîşan kir ku jin pêşengên pêvajoyê ne û got, “Ronahî li Îmraliyê ye.”
Ayla Akat Ata bal kişand ser mîtînga 4’ê Çileyê, pêvajoyên 8’ê Adarê, 21’ê Adarê û 25’ê Mijdarê û ragihand ku jin wê di navenda têkoşîna civaka demokratîk de bin.
Çetîn Arkaş jî qala pêvajoya çûyîna Îmraliyê ya dema 2013-2015’an kir û ragihand ku wê demê fikarên wan ên li ser xwegihandina çareseriyê hebû.
Arkaş destnîşan kir ku ji bilî çareseriya demokratîk rêyeke din nîne; şer çiqasî biqewime, êş çiqasî bê kişandin jî dawiya vê meseleyê çareserî ye û got, ji ber vê yekê piştî 9 salan careke din çûn Îmraliyê.
Çetîn Arkaş qala rewşa pozîtîf a ji destpêkirina pêvajoyê û vir ve kir û diyar kir ku ev yek têra serxistina pêvajoyê nake.
Arkaş got, “Bêguman hin tişt diqewimin, li Giravê hevdîtin dewam dikin. Em li bendê ne û pêşniyar dikin ku ev yek derbasî qonaxeke cuda bibe. Di 4’ê Çileyê de em ê mîtîngeke mezin lidar bixin. Divê zemîna wê yekê bê afirandin ku Rêber Apo bixwaze bi kê re hevdîtinê bike karibe bibîne. Aştî tiştekî bi xêr e. Xwegihandina demokrasiyê tiştekî nebaş nîne. Aştî ji şer bêhtir pêwîstiya xwe bi wêrekiyê heye. Ji min re dibêjin, ‘Gelo tu xweşbîn e yan jî reşbîn e?’. Ez ne xweşbînim ne jî reşbînim, ez rasteqîn im; hûn jî rasteqîn bin.”
Arkaş got, “Serok di aştiyê de bi biryar e, heta dawiyê jê bawer bikin” û axaftina xwe bi vî rengî dewam kir, “Bawerî tiştekî welê ye ku bi çalakiyan tê kirin. Eger dewlet baweriyê dixwaze, wê vê destnîşan bike. Eger dixwaze bawerî pê were, hingî divê gavên cihê baweriyê biavêje. Ji bo aştiyê çi ji destê me bê em ê bikin. Em dixwazin aştî bi lez pêk were, lê belê em ê tedbîrê ji dest bernedin.”
Di civînê de tim û tim dirûşmên “Bijî Serok Apo” û “Bê Serok jiyan nabe” hatin qîrîn. Piştî axaftinan civîn li çapemeniyê girtî dewam kir.
