Çeteyên SMO’yê yên bi piştgiriya Tirkiyeyê û yên girêdayî hikûmeta demkî ya Sûriyeyê, êrîşên xwe yên li ser Kurdên li Helebê didomînin. Di navbera hikûmeta demkî û Hêzên Sûriya Demokratîk (QSD) de hevdîtinên peymana 10’ê Adarê dewam dikin û QSD’ê garantî da ku wê peymana 1’ê Nîsanê pêk bîne, lê belê çeteyên HTŞ û SMO’yê 6’ê Çileyê bi çekên giran êrîş birin ser taxên Kurdan Eşrefiyê û Şêxmeqsûd ên Helebê. Ev yek bû sedema nerazîbûnên mezin. Parlamenterê Mêrdînê yê DEM Partiyê George Aslan têkildarî van êrîşên çeteyên cîhadîst ên paramîlîter ji ANF’ê re axivî. Aslan destnîşan kir ku çawa Efrîn vale kirin, dixwazin çêkera demografîk a li Helebê jî xira bikin û got, “Yê ku Kurdên li vir ji bo xwe xeter dibîne ne hikûmeta Sûriyeyê ye, Tirkiye ye. Tirkiye naxwaze Kurd li Sûriyeyê bibin xwedî statu.”
‘EGER TIRKIYE NEBÛYA HIKÛMETA SÛRIYEYÊ BI SER WAN TAXAN DE NEDIÇÛ’
Parlamenterê DEM Partiyê George Aslan diyar kir ku êrîşên çeteyên girêdayî hikûmeta demkî ya Sûriyeyê yên li ser her du taxên Kurdan ên li Helebê, di rojekê de pêk nehatin û destnîşan kir ku divê plana li pişt êrîşan baş were lêkolînkirin. Aslan bilêv kir ku li pişt van êrîşan rola Tirkiyeyê heye û got, “Eger Tirkiye nebûya, hikûmeta Sûriyeyê bi hêzên di destê xwe de nedikarî bi ser wan taxan de biçe.”
‘GEŞEDAN NÎŞAN DIDIN KU TÊKILDARÎ ÊRÎŞÊN LI SER TAXÊN KURDAN DYE, ÎSRAÎL Û TIRKIYEYÊ LI HEV KIRIYE’
Aslan ragihand ku divê hevsengiya navneteweyî ya li pişt êrîşên li ser Kurdan baş were lêkolînkirin û got, “Beriya êrîşa li ser her du taxên Kurdan, li Parîsê Îsraîl, DYE û hikûmeta Sûriyeyê hevdîtinek pêk anîn. Wezîrê Karên Derve yê Tirkiyeyê Hakan Fîdan jî weke çavdêr tevlî vê hevdîtinê bû. Dîsa beriya êrîşa li ser her du taxên Kurdan, li Şamê di navbera hikûmeta demkî û QSD’ê de têkildarî Peymana 10’ê Adarê civînek hebû û dema ku hevdîtin dewam dikirin, wezîrê karên derve yê hikûmeta demkî mîna ku mirovên li wir bike der ragihand ku civîn qediya. Piştre jî êrîş destpê kirin. Ev rewş nîşan dide ku têkildarî êrîşên li ser her du taxên Kurdan ên li Helebê DYE, Îsraîl û Tirkiyeyê li hev kiriye.”
‘TIRKIYE BI XWE RE DI NAVA NAKOKIYÊ DE YE’
Aslan bilêv kir ku xuya dibe ku Tirkiye bi xwe re di nava nakokiyê de ye û ev tişt got, “Li Tirkiyeyê desthilatdarî wê li aliyekê têkildarî meseleya Kurd pêvajoyê bimeşîne, lê li aliyê din jî li Sûriyeyê piştgirî bide kesên êrîşî Kurdan dikin. Kurd dê vê qebûl nekin.”
‘TIRKIYE NAXWAZE KURD LI SÛRIYEYÊ BIBIN XWEDÎ STATU’
Aslan diyar kir ku hedefa li vir statuya Kurdan a li Sûriyeyê ye û anî ziman ku dibe ev êrîş hîn zêdetir bıbın. Aslan destnîşan kir ku bi êrîşên li ser taxên Kurdan hewl didin demografiya li Helebê xira bikin û ev tişt anî ziman, “Çawa Efrîn vale kirin, dixwazin demografiya li Helebê jî xira bikin. Yê ku Kurdên li vir weke xeterî dibîne ne hikûmeta Sûriyeyê ye, Tirkiye ye. Li vir hedef rêveberiya xweser e. Tirkiye naxwaze Kurd li Sûriyeyê bibin xwedî statu.”
‘GELO LI CIHEKÎ KU SERÊ MIROVAN TÊ JÊKIRIN, WÊ XRISTIYAN BIMÎNIN?’
Aslan ê Suryanî, wiha got, “Li herêma Xabur a Sûriyeyê, gundên Asûriyan hebûn. Çeteyên DAÎŞ’ê êrîşî wan gundan kirin, gelek kes revandin û yan jî bi fîdyeyê berdan, piraniya Asûriyan neçar man ku ji warê xwe koç bikin. Niha li wan gundan pir kêm mirov hene. Berê li Helebê nifûseke mezin a Suryaniyan hebû, ew nifûs niha bûye ji çaran yek. Gelo li cihekî ku serê mirovan tê jêkirin, wê Xristiyan bimînin? Hemû reviyan Urdun, Lubnan û Ewropayê.”
‘ÊRÎŞÊN LI HELEBÊ LI CEM KURDÊN LI HER ÇAR PARÇEYAN NERAZÎBÛN Û HÊRSEKE MEZIN ÇÊKIR’
Aslan diyar kir ku armanca êrîşên çeteyên cîhadîst a li ser Dêr Hafirê ew bû ku Kurdan ber bi aliyê Qamişlo û Hesekê ve bibin û got, “Ez difikirim ku wir jî rehet naberdin. Eger şert û merc guncaw bibin û hêzên emperyal têkildarî vê yekê îşaretek bidin, wê êrîşî wir jî bikin. Êrîşên li Helebê li cem Kurdên li her çar parçeyan nerazîbûn û hêrseke mezin çêkir. Ez hêvî dikim ev rewş Kurdan ber bi yekîtiya neteweyî ve bibe.”
‘TIRKIYE BI ÊRÎŞKIRINA KURDAN, LI ROJHILATA NAVÎN TI TIŞTÎ BI DEST NAXE!’
Aslan destnîşan kir ku Tirkiye bi êrîşkirina Kurdan li Rojhilata Navîn ti tiştî bi dest naxe û got, yekane tişta li vir were kirin, mîna Rêberê Gelê Kurd Abdullah Ocalan gotiye, xurtkirina “xwişk-biratiya Tirk-Kurd” e. Aslan ragihand ku Tirkiye eger bixwaze li Rojhilata Navîn û cîhanê bibe welatekî ku hurmet jê re bê girtin, divê bi Kurdan re bibe yek.
