PKK’ê ragihand ku ew ê li gorî biryara Rêber Apo ya 27’ê Sibatê tevbigere. Serokê Giştî yê Partiya Kedê (EMEP) Seyît Aslan pêvajo nirxand û got, “Dîroka cîhanê nîşan dide ku aştî û demokrasî bi têkoşînê dikarin pêk werin û tenê bi têkoşînê dikarin bêne parastin.”
Serokê Giştî yê EMEP’ê Aslan anî ziman ku armancên desthilatdariyê hebin jî nikare giraniya meseleya Kurd ji needîtî ve bê û got, “Desthilatdariyê xurtkirina ‘eniya navxweyî’ li hemberî rewşa dawî ya li Rojhilata Navîn û bandora neyînî ya li Tirkiyeyê ji xwe re kir hinceta vê pêvajoyê. Me ev yek hem di daxuyaniyên cuda yên Serokkomar Erdogan, hem jî hevkarê wî Serokê Giştî yê MHP’ê Devlet Bahçelî û nivîsên şêwirmendên Erdogan de dît.
Eşkere ye ku Serokkomar Erdogan û kesên nêzî wî dixwazin vê pêvajoyê ji bo dirêjkirina temenê desthilatdariyê yê Erdogan weke parçeyek ji polîtîkayê dinirxînin. Lê belê yên ku pêvajoyê tenê di vê çarçoveyê de dinirxînin, haya xwe ji giraniya meseleya Kurd û bandora pêvajoyê nîne.”
Seyît Aslan got, “Bi têkoşîna hêzên gel ên demokratîk, bi têkoşîna dilxwazên aştiyê wê diyar bibe ku ev pêvajo bigihêje kîjan astê.
Li aliyê din hin gav hene ku di vê çarçoveyê de divê bêne avêtin. Beriya her tiştî divê siyasetmedarên girtî, rojnamevan, hevşaredar, parêzvanên mafên mirovan ên girtî bêne berdan, dawî li qeyûman bê anîn û wezîfeya hevşaredaran radestî wan bê kirin. Yanî divê mafên hatine desteserkirin bêne dayin, astengiya li pêşiya mafê perwerdeya bi zimanê dayikê bêne rakirin. Akademîsyenên aştiyê yên bi neheqî ji zanîngehan hatin avêtin, mafên wan hemûyan bêne dayin û karibin li wezîfeya xwe vegerin.”
Aslan diyar kir ku ji bo çareseriya gelparêz û demokratîk a meseleya Kurd, ji bo çareseriya li ser bingeha welatîbûna wekhev divê gav bêne avêtin, lê belê ev gavên ku hatin diyarkirin dibe ku bibin gavên destpêkê ku zextê bikin.
HÊZÊN KED Û DEMOKRASIYÊ DIVÊ XWE BIDIN ALIYÊ AŞTIYÊ
Aslan destnîşan kir ku hêzên ked û aştiyê divê xwe bidin aliyê aştiyê û got, “Dîroka cîhanê nîşan dide ku aştî û demokrasî bi têkoşînê dikarin pêk werin û tenê bi têkoşînê dikarin bêne parastin. Yanî qezenckirina pêvajoyê têrê nake, ji bo aştiya hatiye qezençkirin lawaz nebe divê têkoşîn bê meşandin.”
Aslan destnîşan kir ku ji bo vê yekê jî divê hêzên alîgirê ked û demokrasiyê weke aliyê aştiyê têkoşînê bimeşînin. Di nava vê pêvajoyê de li gel alîgirên bi coş ên pêvajoyê, dibe ku yên rexne bikin jî hebin ku ev yek xwezayî ye. Lê belê yên ku xwe li pêşberî dîrokê di mijara aştiyê de berpirsyar dibînin, divê tenê rexne nekin.”
