Berdevka berê ya Tevgera Jinên Azad (TJA) Ayşe Gokkan ji Girtîgeha Girtî ya Jinan a Sîncanê têkildarî cezayê hepsê yê lê hatî birîn, peyam şand.
Peyama Ayşe Gokkan bi vî rengî ye:
“Di doza ku bi sûcdariya endamtiya rêxistinê derbarê min hatî vekirin de, dadgehê bi giştî 19 sal û 6 meh cezayê hepsê li min birî û biryar da ku girtîbûna min dewam bike. Ev biryara hatî dayîn, baweriya me ya ji meşrûiyeta têkoşîna me re lewaz nekiriye; berevajî biryardariya me ya ji bo heqîqet, edalet û azadiyê hîn xurttir kiriye. Ez spasiya hemû rêxistinên jinan, rêxistinên girseya demokratîk, parêzvanên mafên mirovan, hiqûqnas, rêxistinên mafên mirovan ên navneteweyî, nûnerên partiyên siyasî, kedkarên çapemeniyê û her kesê xwedî wijdan dikim ku ji roja ewilî ya dozê heta rûniştina biryarê pêvajoyê ji nêz ve şopandin û piştevanî raber kirin.
Ev piştevaniya xurt ne tenê ji bo min; bûye îfadeyeke bi wate ya têkoşîna wekhevî û azadiyê ya jinan û xwedî derketina li mafên mirovan û daxwaza edaletê. Her piştevaniya ku di vê pêvajoyê de hatî raberkirin, her peyama hatî şandin û her denge hatî bilindkirin, careke din nîşan daye ku em bi tenê nînin.
Em dizanin ku têkoşîna jinan a ji bo azadî, wekhevî û jiyana bi rûmet ne sûc e. Bi hêviya ku ji aliyê piştevaniyê ve hatî mezinkirin, em ê her tim piştevanî bidin kesên ku têkoşîna maf û azadiyê dimeşînin.
Ez spasiya her kesê bi me re, deng dane dengê me û hêvî mezin kirine, dikim.
Piştevanî hêza me ya herî mezin e.”
