Partiya Wekhevî û Demokrasiyê ya Gelan (DEM Partî) a Enqereyê li taxa Dîkmen a navçeya Çankaya ya Enqereyê xwarina ji bo piştgiriyê da. Hevserokê Giştî yê DEM Partyê Tuncer Bakirhan, parlamenterên DEM Partî, endam û nûnerên saziyên demokratîk û gelek kes beşdar bûn.
Hevserokên DEM Partiyê yên Enqereyê Tatligul Gul û Fatîn Kaya ewilî axivîn. Piştre Hevserokê Giştî yê DEM Partiyê Tuncer Bakirhan axivî û kesên di têkoşîna azadî, aştî û demokrasiyê de jiyana xwe ji dest dane bi bîr anî. Tuncer Bakirhan ji kedkarê Çapemeniya Azad Huseyîn Aykol ku meheke ku li beşa lêneherîna awartê ya nexweşxaneyê tê dermankirin şifa xwest.
Bakirhan di şahsê Seyîd Riza de qurbaniyên terteleya Dersimê bi bîr anî û wiha got: “Divê edî komara Tirkiyeyê demokratik bibe. Komar ev sed sal in ji bo gelan êş û xwîn anî. Edî bila ew serdem cuda bibe. Bi têkoşîna me jî wê cuda bibe. Di vê sedsalên derbasbûyî de ziman, çand û nasname tune hatin hesibandin. Em jî dibêjin edî bila reng tune neyên hesibandin.”
‘GER DEMOKRASÎ PÊK WERE WÊ GAVÊ AŞTÎ PÊK WERE’
Tuncer Bakirhan bal kişand ser banga dîrokî ya Rêber Apo û anî ziman ku Pêvajoya Aştî û Civaka Demokratîk deriyeke nû vekir û got, “Rojhilata Navîn niha şer û pêvçûnan de ye. Sedema wê jî pergalên heyî ye. Ji ber tunehesibandin û bê demokratîkbûyinê ew şer û pêvçûn hene. Em niha di pêvajoyeke pir girîng de derbas dibin. Divê demokrasî û aştî bi hev re bibe. Heke demokrasî hebe aştî jî dê were vî welatî. Ez bang li desthilatê dikim ku gorên Seyîd Riza, Şêx Saîd û hemû windahiyên me eşkere bikin. Girtiyên nexweş dikarin bên berdin. Karkerên bi KHKê ji kar hatine dûrxistin vegerin ser karê xwe. Her wiha girtiyên ku cezayê wan qediyane bên berdan. Fîgen Yuksekdag, Selahattîn Demirtaş û girtiyên doza Kobanê dikarin werin berdin. Şeredariyên qeyûm tayinî şûna wan hatine kirin dikarin vegerin ser karê xwe. Ew gav ji bo aştiyê girîng in.”
‘DIVÊ KOMÎSYON DEMILDEST BIÇE ÎMRALIYÊ’
Bakirhan destnîşan kir ku Komîsyona Hevgirtina Neteweyî, Xwişk-Biratî û Demokrasiyê divê biçe Girava Îmraliyê. Bakirhan anî ziman ku dewlet bi Îmraliyê re hevdîtinê dike û e bang kir: “Lê çima komîsyon naçe Girava Îmraliyê? Divê komîsyon demildest biçe Girava Îmraliyê. Divê komîsyon bi lez tevbigere.”
Bakirhan li ser girîngiya hevgirtin û têkoşîna rêxistinkirî rawestiya û got, “Dema em xwedî li hevdu derketin wê gavê em dikarin vê pergala zordest derbas bikin. Ger têkoşîn bi hev re û rêxistinkirî bê meşandin wê gavê wê bi ser bikeve.”
Bername piştî guhdarkirina stranan bi dawî bû.
