Rêxistina Partiya Wekhevî û Demokrasiyê ya Gelan (Partiya DEM) a Dîlokê, di çarçoveya “Hevdîtinên Aştî û Civaka Demokratîk” de li oteleke navçeya Şahînbeyê bi gel re hat cem hev. Hevserokê Giştî yê Partiya DEM’ê Tuncer Bakirhan, endama Şandeya Îmraliyê ya Partiya DEM’ê Pervîn Buldan, Parlamentera Dîlokê ya Partiya Kedê (EMEP) Sevda Karaca, nûnerên sazî û dezgehan û gelek welatî beşdarî hevdîtinê bûn.
Civîn bi deqeyek rêzgirtinê ji bo bîranîna kesên di têkoşîna azadiyê de jiyana xwe ji dest dane dest pê kir. Di dema rêzgirtinê de girseyê dirûşmên “Şehîd namirin”, “Bijî berxwedana Rojava”, “Bijî berxwedana Kobanê”, “Bijî Serok Apo” û “Bijî yekîtiya gelê Kurd” berz kirin.
Hevserokê Giştî yê Partiya DEM’ê Tuncer Bakirhan di civînê de axivî û di destpêka axaftina xwe de bal kişand ser serdegirtinên li dijî ESP’ê. Bakirhan destnîşan kir ku di geşedanên li Rojava de yekîtiya Kurdan derketiye pêş û spasiya gelê ku ji bo Rojava derketine qadan û nerazîbûna xwe ya demokratîk nîşan dane kir.
Bakirhan bal kişand ser rola Rêber Apo ya mudaxelekirina pêvajoyê û wiha got:
“Birêz Ocalan ji roja ewil ve ji QSD’ê re got ‘Bi Şamê re pêvajoya demokratîk bide destpêkirin.’ Ji Enqereyê re got ‘Di nav planeke ku Kurdan tasfiye dike de cih negirin.’ Ji me re jî got ‘Xwedî li Rojava derkevin.’ Ev helwesta Birêz Ocalan êrîşên li wir bi dawî kir û pêkhatina peymana 30’ê Rêbendanê pêkan kir. 30’ê Rêbendanê ne teslîmiyet e, gaveke ku jiyana gelê Kurd garanti dike ye.”
Bakirhan anî ziman ku gelê Kurd ne bi tenê ye û got, “Rojava ya bindestan e, ya Kurdan e. Gelê Kurd ne tenê li bajarên Kurdan, li Sûriyeyê jî dê ji bo jiyaneke demokratîk têkoşînê bide. Jina Kurd dê li wir jiyaneke sekuler bimeşîne. Kî dibêje ‘Kurd teslîm bûn’, derewan dike.”
Bakirhan destnîşan kir ku divê Pêvajoya Aştî û Civaka Demokratîk a ku bi banga 27’ê Sibatê ya Rêber Apo hatibû destpêkirin bi ser bikeve û bang li parlamenê kir. Bakirhan got: “Êdî em berê xwe bidin Enqereyê. Li Tirkiyeyê pirsgirêka Kurd heye û ev mase ji bo vê hat avakirin. Em alîgirê aştiyê ne. Divê her kes tevkarî bide vê pêvajoyê. Divê parlamen serê pergelê deyne ser aştiyê û çembereke fireh a ku tu kesî dernaxe derve xêz bike. Tu nasname, ol û bawerî nabe ku li derveyî vê çemberê bimîne.”
Piştî axaftina Tuncer Bakirhan, hevdîtina bi gel re ji çapemeniyê re girtî berdewam kir.
