Bi beşdariya Hevserokê Giştî yê Partiya Wekhevî û Demokrasiya Gelan (DEM Partî) Tuncer Bakirhan, bi şîara “Em xwedî li vîna xwe derdikevin, li dijî sepanên qeyûm dengê xwe bilind dikin” daxuyaniyek hat dayîn. Daxuyaniya ku li ber Şaredariya Bajarê Mezin a Amedê hat lidarxistin, hevşaredarên bajar û navçeyan ên DEM Partiyê jî tê de amade bûn.
ME DI RÊVEBERIYÊN HERÊMÎ DE PROJEYÊN GIRÎNG PÊK ANÎN
Bakirhan li vir axivî û diyar kir ku wan bi hevşaredaran re nîqaşeke berdar meşandiye. Bakirhan anî ziman ku ji sala 1999an ve ezmûneke wan a rêveberiyên herêmî heye û got ku her çend di demên cuda de astengî derketibin jî, wan projeyên demokratîk, zelal, beşdar, azadîxwaziya jinê û dostê jîngehê pêk anîn e.
Bakirhan destnîşan kir ku wan ji bo serdema li pêş, li ser xebatên xurtir ên li qadê nîqaş kirine û kêmasiyên ku hatine dîtin jî hatine nirxandin.
3 DEWR IN VÎNA GEL TÊ DESTESERKIRIN
Bakirhan bal kişand ser desteserkirina qeyûman û bi bîr xist ku ji sala 2016’an ve sê dewr in vîna gel tê desteserkirin. Bakirhan diyar kir ku şaredarî bi rengekî bêserûber tên birêvebirin û got ku qeyûm ji bo welat bûye “şermek”.
Bakirhan anî ziman ku gel di hilbijartinên dawî de bi tercîhkirina partiya xwe, helwesta xwe ya li dijî qeyûman nîşan daye û xwest ku ev sepan bi dawî bibin.
DIVÊ ŞAREDARÎ RADESTÎ NÛNERÊN GEL BÊN KIRIN
Bakirhan diyar kir ku di serdemeke ku behsa Pêvajoya Aştî û Civaka Demokratîk tê kirin de, divê şaredarî ji nûnerên bijartî yên gel re bên vegerandin. Bakirhan destnîşan kir ku divê 13 hevşaredarên ku ji erka wan hatine dûrxistin vegerin ser karê xwe û got ku ji bo vê yekê dikare rêziknameyên zagonî werin çêkirin.
Bakirhan bi bîr xist ku şaredariyên Êlih, Mêrdîn û Xelfetiyê hatine desteserkirin û got ku gavên Wezîrê Navxweyî yê nû di vê mijarê de dikarin xizmeta pêvajoyê bikin. Bakirhan diyar kir ku di nava meha Remezanê de gavên şênber dikarin werin avêtin.
DIVÊ DEST JI SEPANÊN CUDAKAR BÊ BERDAN
Bakirhan anî ziman ku tevî astengiyên burokratîk jî şaredarî xebatên xwe didomînin û xwest ku cudakariya li ser rêveberiyên herêmî bi dawî bibe. Bakirhan got ku ji bo projeyên ku jiyana gel hêsan dikin pêk werin, divê her kes beşdar bibe.
Bakirhan diyar kir ku di serdemeke bê girtin, bê binçavkirin û bê qeyûm de, dê xizmeteke baştir ji gel re were kirin û kêmasiyên heyî jî bi hev re werin sererastkirin.
DIKARE BIBE GAVA YEKEM A PÊVAJOYA NÛ
Bakirhan bersiva pirsên rojnamevanan da û got ku derbasbûna qonaxeke nû hem ji aliyê Devlet Bahçelî, hem Recep Tayyip Erdogan û hem jî ji aliyê Rêber Apo ve hatiye ziman.
Bakirhan dubare kir ku ji bo serkeftina vê gava nû divê dawî li qeyûman bê anîn û got ku gel li şûna gotinan, dixwaze gavên şênber bibîne. Bakirhan destnîşan kir ku vegerandina hevşaredarên ku ji erka wan hatiye dûrxistin, dikare bibe yek ji gavên herî pêşîn û girîng ên pêvajoya nû.
Daxûyaniya çapemeniyê bi çepik û dirûşman bi dawî bû.
