Hevserokê Giştî yê DEM Partiyê Tûncer Bakirhan piştî civîna koma partiya xwe ya li Meclîsê bersiv da pirsên rojnamevanan û daxuyaniya Berdevkê AKP’ê Omer Çelîk nirxand ku gotibû, “Di nava vê mehê de dibe ku pêşketinên nû çêbibin.”
Bakirhan got, “Em jî tevlî wê dibin, êdî bila pêşketinên nû û girîng pêk werin. Bendewariya civaka Tirkiyeyê jî ev e. Ya rast heyeta me ya ku ji bo dîtina Birêz Ocalan çûbû giravê jî heman tişt gotibû. Em hêvîdar im ku wê tiştên baş û bedew pêk werin. Dixwazim bibêjim ku êdî li şûna gotinan dema gavavêtinê ye.”
Bakirhan li ser hevdîtina ku tê payin bi Wezîrê Edaletê re bê kirin jî got, “Serlêdan hate kirin. Dem hîn diyar nebûye, lê belê dibe ku rojên bê pêk were.”
Têkildarî pirsên rojnamevanan ên li ser daxuyaniyên Serokê Giştî yê MHP’ê Devlet Bahçelî jî Bakirhan got, “Bêguman gotinên Birêz Bahçelî gelekî girîng in. Yanî ji bo çekdanînê yan jî destberdana ji çekan ji xwe banga Birêz Ocalan hebû. Ev ne sireke. Dema ku pêwîstiyên wê bi cih hatin anîn herhal muxataban jî gotibûn wê dest ji çekan berdin. Hêvîdarim rojên bê wê rojên bedew be ku dûrî ji şer, tundî û çekan be ku mîna Birêz Omer Çelîk jî got. Hêvîdar im em ê gavên bedew bibînin.”
Bakirhan li ser pirsa têkildarî çekdanînê got, “Em bi vê nizanin. Biryar a rêxistinê ye. Lê belê tiştekî gelekî girîng hebû ku Serok Pervîn ragihand. Gotibû, ‘Min yekemcar dît ku Birêz Ocalan ewqasî bi moral bû, ewqasî bi hêvî bû’. Ev yek pêşketineke gelekî girîng û baş e. Hêvîdar im ev moral û hêvî wê bandorê li temamiya Tirkiyeyê bike.”
Bakirhan têkildarî rewşa tenduristiyê ya endamê Heyeta Îmraliyê ya DEM Partiyê Sirri Sureyya Onder got, “Ya niha ji bo me girîng ew e ku Serok Sirri tavilê baş bibe. Em hêvîdar in ku wê Serok Sirri zû baş bibe, bi rengekî çalak beşdarî karê ku nîvco maye bibe.”
