Ji bo bîranîna kesên di erdheja 6’ê Sibatê ya bi navenda Mereşê de jiyana xwe ji dest dane, di sala sêyemîn de bi pêşengiya Platforma 6’ê Sibatê gelek kes li ber Lîseya Anadolu ya Necmi Asfuroglu li Antakyayê hatin cem hev û heta Kolana Sarayê meşiyan. Di meşê de pankartên “Em ji bo windayên xwe dadweriyê dixwazin”, “Ji bîr kirin tune, efûkirin tune” û dowîzên “Hatay ya me ye, welat ê me ye”, “Ji sermayeyê re na, ji herêma erdhejê re budçe”, “Em dixwazin wek mirov bijîn”, “Hûn dengê me dibihîzin?”, “Hatay di bin kavilan de ye”, “Em xaniyên mayinde û bêpere dixwazin” hatin hildan. Di meşê de ku nûnerên gelek partiyên siyasî û rêxistinên civakî beşdar bûn, dirûşmên “Wê roj bê û dewran vegere, berpirsiyar dê hesab bidin gel” hatin berz kirin.
Piştî meşê, li ser navê Platforma 6’ê Sibatê Mehtap Aslan Yuregir daxuyaniya çapemeniyê xwend. Yuregir bi bîr xist ku sê sal di ser erdhejê re derbas bûne û got: “Ev bajar tevî hemû êşa xwe, tije mirovên ku dixwazin li ser piyan bimînin e. Şîn hîn di hundirê me de ye û mixabin dadwerî hîn pêk nehatiye. Em pirs dikin: Kî radibe ser piyan? Heke bajarê nû tê avakirin niştecîhên kevin li derve dihêle û çanda taxê tune dike, ew ne jiyan e.”
EM QEBÛL NAKIN KU JI KOMKUJİYÊ RE BIBÊJIN ÇARENÛS
Endama Platforma Malbatên ji bo Dadweriyê Filiz Ebekler jî destnîşan kir ku windahî ne encama erdhejê ne, encama rayedarên ku erka xwe neanîne cih in. Ebekler got: “Em qebûl nakin ku ji vê komkujiyê re çarenûs bê gotin. Ji ber ku tiştê bi eşkere tê, nabe çarenûs. Em naxwazin berpirsiyar jiyana xwe wek berê bidomînin.”
ÎSKENDERÛN
Li Îskenderûnê jî bi pêşengiya Platforma 6’ê Sibatê meşek hate li dar xistin. Hevserokê Giştî yê Partiya DEM’ê Tuncer Bakirhan û gelek welatî beşdar bûn. Di meşê de pankartên “Em bi hev re bi hêz in” û “6’ê Sibatê ji bîr neke, nede ji bîr kirin” hatin vekirin.
DÊ ÇAWA BÊ JI BÎR KIRIN?
Bakirhan li wir axivî û got: “Êş hîn neqediya ye. Li her derê cîhanê erdhej dibe, lê li tu derê cîhanê bacên erdhejê ji sermayeya alîgirê desthilatdariyê re nayên dayîn. Yên ku ev anîn serê me dibêjin ‘ev çarenûs e’. Em dizanin ku ne çarenûs e. Çarenûs tenê li xizanan dixe. Mirovên me bi zindî xatir ji malbatên xwe xwestin. Ev ê çawa bê ji bîr kirin?”
HATAY WEKÎ DUH E
Bakirhan wiha dewam kir: “Erdhej bû û êşek mezin e, lê karesata herî mezin nebûna dewletê bû. 3 sal derbas bûn, em niha ji Hatayê hatin. Her der wek duh e. Budçe diçe ji bo çek, top û faîzê. Me got hinek ji çekan bibirin û bidin herêma erdhejê, lê guh nadin me.”
SÛCÊN ERDHEJÊ SÛCÊN LI DIJÎ MIROVAHİYÊ NE
Bakirhan axaftina xwe wiha bi dawî kir: Sûcên erdhejê sûcên li dijî mirovahiyê ne. Divê her kesê sûcê erdhejê kiriye bê darizandin. Em soz didin; roja ku dadgehek demokratîk bê, yên ku bûne sedema vê wêranî û mirinê, dê hesab bidin. Malbatên me yên ku li dadweriyê digerin bi tenê nîn in. Em ê li parlamenê û li kolanan têkoşîna xwe bidomînin.”
Li Samandagê jî gel hatin cem hev û bi çalakiyekê kesên di erdhejê de winda kirine bi bîr anîn.
