Serokê Herêma Kurdistanê Nêçîrvan Barzanî ji Newroza Amedê re payemek bi nivîskî şand.
Peyam ji aliyê berdevkê serokatiya Herêma Kurdistanê Dilşad Şehab ve hate xwendin.
Peyama Nêçîrvan Barzanî wiha ye:
‘‘Xwişk û birayên hêja
Amadevanên hêja,
Ez Cejna Newrozê û sersala nû ya Kurdan bi germî û ji dil li hemû gelê Kurd pîroz dikim. Her wiha ez cejna we xwişk û birayên hêja yên ku îro li Ameda rengîn ji bo pîrozkirina Newrozê kom bûne, pîroz dikim. Newroz ji bo me Kurdan cejneke taybete, Newroz nîşandana hêviyên miletekî ye ku her tim germiya azadî û bihevreyiyanê bûye.
Hêvîdarim ev cejn ji bo hemûyan bibe sedema xêr û aramiyê. Ev girseya we ya ku li Amedê bûye karekî salane yê ciwan, bi serê xwe cejna jiyan û ciwaniyê ye. Ev yek nîşaneya daxwaz û peyama gelê Kurd a ji bo biratî û qebûlkirina hev e.
Di demekê de ku em îro Cejna Newrozê pîroz dikin, em dixwazin piştgiriya xwe ya dilsozane ya ji bo aştiyê tekez bikin. Pêkanîna aştiyê li Tirkiyeyê karekî dîrokî ye, ev aştî di berjewendiya her du gelên Kurd, Tirk û tevahiya herêmê de ye. Aştî yekane rê ye ku paşerojeke geş ji bo nifşên me misoger dike. Çarenûs û berjewendiyên Kurd û Tirkan yeke, em ji mêj ve cîranin. Tenê bi rêya bihevreyiyan û aramiyê em dikarin bi ser astengiyan de serkevin û jiyaneke bi rûmet ji bo her kesî ava bikin.
Em spasiya wan gavan dikin ku heta niha ji bo serxistina aştiyê hatine avêtin. Em bi hêvî li van hewldanan dinêrin û çavê me li gavên zêdetire.
Em li Herêma Kurdistanê dîsa hemû hevkariya xwe ji bo serxistina aştiyê nîşan didin. Em li benda bidawîbûna pevçûnan û bicihkirina aramiyê ne. Werin em hemû bi hev re kar bikin da ku di van rojan de ku herêm di nav şer û pevçûnên dijwar re derbas dibe, aştî bibe rastiyeke hertimî.
Newroza we pîroz be, her sal bi xêr û xweşî.”
