Kongreya 2’emîn a Asayî ya Rêxistina Bajarê Agiriyê ya Partiya Wekhevî û Demokrasiyê ya Gelan (DEM Partî) li navenda bajêr bi beşdarbûneke zêde hate lidarxistin.
Hevserokê Giştî yê DBP’ê Keskin Bayindir, parlamenterên DEM Partiyê, hevşaredar, rêxistinên jinan û gelek welatî beşdarî kongreyê bûn, ku bi dirûşma “Bi Aştî û Civaka Demokratîk Em Rêxistin Dibin” hate lidarxistin. Keskin Bayindir, di kongreyê de axivî û diyar kir ku pêvajoya ji bo çareserkirina pirsgirêka Kurd hatiye meşandin gihîştiye qonaxeke nû û got, “Pêvajo wisa ber bi xaleke din ve çû ku azadiya Kurdan gelekî nêz e.”
Keskin Bayindir wisa got: “Abdullah Ocalan di vê manifestoyê de dibêje ‘Gelê min, êdî em bi têkoşîna xwe ya 50 salî, bi berdêl û kedên mezin, gihîştine pêvajoyeke nû. Êdî gelê Kurd gihîştiye asteke wiha ku ev gel heq dike bi rûmet aştiyê bike.’ Me deriyê aştiyê vekiriye. Ji ber ku em bi salan e bi ked û berdêlên mezin gihîştine vir.”
Bayindir destnîşan kir ku pirsgirêka Kurd bi PKK’ê dest pê nekiriye û bi PKK’ê jî dawî nayê û bal kişand ser girîngiya ewlehiya hiqûqî ya zimanê zikmakî û mafên demokratîk.
Bayindir destnîşan kir ku divê dewlet ji bo çareseriyê gavan bavêje û wiha got: “Divê em bi rêxistinbûn, yekîtî û hevgirtina xwe zextê li dewletê bikin. Ji dîroka cîhanê heta îro tu dewlet û desthilatdarî mafên gelên bindest û di bin zextê de li gorî daxwazên wan nedaye. Eger em di nava yekîtî û hevgirtinê de bin, bawer bikin ku emê di demek nêz de bigihêjin mafên xwe.” Wî her wiha girîngî da yekîtî û rêxistinbûnê û got, “Ev sedsal wê bibe sedsala gelê Kurd.”
