Civîna 11’an a Komîsyona Demokrasî, Xwişk-Biratî û Hevgirtina Mîllî ku bi boneya çareserkirina pirsgirêka Kurd li Meclisê hatiye avakirin, bi guhdarîkirina nûnerên komele û weqfan didome. Serokê Komeleya Pîşesaz û Karmendên Başûrrojhilat (GUNSÎAD) Şah Îsmaîl Bedirhanoglû di rûniştina ewil a civînê de axivî û got ku hêviya wî ya ji bo bidawîbûna pevçûn û tundiyê pêş ketiye. Bedirhanoglû, da zanîn ku neçareserkirina pirsgirêka Kurd plankirina pêşerojê, planên aboriyê û gavên demokratîkbûnê asteng dike û bandoreke neyînî li ser têkiliyên bi Yekitiya Ewropayê re dike. Bedirhanoglû, got: “Ji ber vê meseleyê, nêzî 2 trîlyon dolar hatin windakirin anku biqasî 2 Tirkiyeyan pere pûç bûne.”
Di berdewamê de Bedirhanoglû anî ziman ku hewce ye ji bo PKK’iyên çekên xwe şewitandin zemîna yasayî ya vegerê were amadekirin û wiha pê de çû: “Tiştên divê bên kirin çi ne? Kurd, bi taybet jî hemwelatiya destûra bingehîn ku hemû kesî digire navxwe dixwazin. Her wiha gelê Kurd dixwaze astengiyên li pêşiya zimanê wan were rakirin û yekser di perwerdeyê de were bikaranîn. Û ev yek pêwîstiyeke. Hewcehî pê heye ku bi sererastkirineke yasayî rê li ber were vekirin ku li gel qada perwerdeyê, di heman demê de di qadên siyasî û hemû qadên jiyanê de were bikaranîn. Heke yasayên pêşiya vê digirin hebin, dixwazim ev yasa bên rakirin. Ez rêveberiyên xwecihî daxwaza dikim.”
Di berdewama axaftina xwe de Bedirhanoglû bi bîr xist ku Tirkiyeyê ji avabûna Herêma Federe ya Kurdistanê ditirsiya, weke gef didît lê bi demê re ev rewş guheriye. Bedirhanoglû, got: “Rêjeya bazirganiyê ya di navbera Tirkiye û Herêma Kurdistanê dora 13 milyar dolaran e. Dema em çûn serdana serokkomarê demê Abdullah Gul, ji me re got; ‘Divê em geşedanên li wê derê ne weke gefekê lê weke firsendekê bibînin.’ Ji bo Kurdên li Sûriyeyê jî dixwazim heman fikran parve bikim. Divê em wê derê ne weke gef lê weke firsendekî bibînin û wisa nêz bibin.”
Bedirhanoglû, gotina Serokkomarê AKP’î Tayyîp Erdogan a “Pirsgirêkên Kurdên li Iraq û Sûriyeyê di heman demê de pirsgirêka me ye” bi bîr xist û axaftina xwe wiha qedand: “Divê ev gotin li qadê jî veguherin siyasetê. Nêzikatiya ku pirsgirêkên Kurdên li Iraq û Sûriyeyê dê Tirkiyeyê bihêztir bike. Pêdivî bi destûreke bingehîn a nû heye. Berpirsyartiya siyaseta sivîl e ku destûreke nû ya bingehîn çêbike.”
