Dewleta Tirk a dagirker û çeteyên wê êrîşên xwe yên bejahî û hewayî li ser Herêma Bakur û Rojhilatê Sûriyeyê didomînin. Bi taybet li Bendava Tişrîn û Pira Qereqozaxê êrîşên pir dijwar tên kirin. Wek ku tê zanîn Bendava Tişrîn ji bo gelê Herêma Bakur û Rojhilatê Sûriyeyê çavkaniyek jiyanê ye ku pê ava xwe tînin û jêdera elekitrîkê ye. Gelê Herêma Bakur û Rojhilatê Sûriyeyê ji bo ku av û elektrîka xwe biparêzin ev 60 rojin bi kerwanên bajar bajar diçin bendavê û nobet digrin.
Gelê ku vê kêliyê li Bendavê nobetê digrin û bi rojane li hemberê vê serma û seqemê li ber xwe didin ji ajansa me ANF’ê re axivîn.
‘PARASTINA ME ŞERÊ GEL Ê ŞOREŞGERÎ YE’
Welatiya bi navê Cîhan Ehmed a ku niha li Bendava Tişrînê ji bo parastina Bendava xwe têkoşîn dike, ji me re helwesta xwe wiha vegot: “Em wek gelê Kantona Cizîrê yê Herêma Bakur û Rojhilatê Sûriyeyê bi karwanê xwe re hatine Bendava Tişrîn da ku em parastina av, elektrîk û axa xwe bikin. Her wiha çi şerê ku were ser xaka me em amade ne ku wê derê biparêzin. Ne tenê Bendava Tişrîn lê belê her der xaka me ye û erka me ye ku em wê derê biparêzin. Dewleta Tirk a dagirker bi balafirên xwe yên şer sivîlan dike hedef da ku ji Bendavê dur bikevin û dagir bike. Bila dewleta Tirk a dagirker bizanibe ku ev Bendav çavkaniya jiyankirina giştî gelê Herêma Bakur û Rojhilatê Sûriyeyê ye, ji ber wê jî em ti carî dest ji Bendava xwe bernadin û çi ji me were xwestin ji bo parastina vê bendavê em hazirin. Ev Bendav bi xwîna zarokê me hatiye parastin ji ber vê jî em rê nadin vî dijminê xwînxwar ku Bendava Şehîdan dagir bike. Parastina ku em wek dayik didin meşandin şerê gelê şoreşgerî ye, eger hêza cîhanê tevahî di destê me de be em şerê kesekî nakin lê dema êrîş were ser me erka me ye ku em parastina xwe bikin. Ez wek dayikek bi temen mezin bang li tevahî rêxistinên mafê mirovan dikin ku van êrîşên dewleta Tirk li ser sivîlan qut bikin û hesabên dijwar jê bixwazin. Dewleta Tirk ji zarokan heta pîran dike hedefa xwe û rojane wan qetil dike. Lê em bi yekîtiya xwe bikaribin welatê xwe biparêzin ji ber ku ev rêxistinên ku bi navê mafê mirovan bang dikin tevahî hevalbendê Erdogan in. Em ê rojane li Bendava Tişrîn nobeta xwe bigirin heya ku Bendava me were rizgar kirin.”
‘EM Ê NEHÊLIN DIJMIN XAKA ME DAGIR BIKE’
Dayika bi navê Leyla Selman a ku ji navçeya Amûdê ya bajarê Qamişlo ye û bi karwanên gel re hatiye bendava Tişrînê, diyar kir ku ew hatine da ku cih û warê xwe biparêzin, ji ber ku ev erkê wan e û pêwîste vî erkî bi cih bînin û wiha pêde çû: “Em ji zarokan heya kal û pîran hatine Bendava Tişrînê da ku em axa xwe, ava xwe û elekitrîka xwe biparêzin. Dewleta Tirk bi teknîka herî giran êrîşê sivîlan dike û her roj komkujiyan li ser sivîlan pêk tîne. Lê em ji van top û balafirên wî natirsin û ev yek wê îradeya me neşkîne ji ber ev Bendav Bendava me ye, ax û ava me ye. Em wek dayikên bi temen mezin em hatine da ku Bendava xwe biparêzin û nabe ti kes xaka me dagir bike. Dewleta Tirk bi çav birçîbûyîna xwe dixwaze xaka me jî dagir bike, lê mafê mirovan jî hevalbendên vê siyaseta qirêjin, eger ne wiha ba wê dewleta Tirk bihataya cezakirin. Bila dewletên cîhanê giştî bizanibin ku em dest ji axa xwe bernadin û em ê cihê aboriya xwe biparêzin. Bendava Tişrîn ji bo me jiyane û em ê vê jiyanê biperêzin. Heya dilopek xwîn di laşê me de hebe em ê parastina xwe û axa xwe bikin. Di dawiyê de ez soz didin ku bi hemû îradeya xwe em ê nehêlin dijmin xaka me dagir bike.”
‘EM DAGIRKERIYA DEWLETA TIRK LI SER XAKA XWE QEBÛL NAKIN’
Piştre jî dayika bi navê Şaha Seîd da zanîn ku ev 59 roj in dewleta Tirk a dagirker Bendava Tişrîn bombebaran dike û dixwaze vê bendavê dagir bike û wiha bilêv kir: “Em wek gel me berê xwe da Bendavê da ku em av, ax û elektrîka xwe biparêzin. Bendava Tişrîn ji bo me çavakniya av û elekitirîkê ye, dewleta Tirk bi çi mafê dixwaze me bê av û elekitrîk bihêle. Em ê parastina ava û elekitrîka xwe bikin. Dewleta Tirk jî bi balafrên xwe yên şer êrîşî sivîlan dike û wan qetil dike. Lê îradeya me xurt e û em ji tank û topên wî natirsin. Em ti car êrîşên dewleta Tirk a dagirker ji bo xwe nakin astengî û em vê riya xwe ya parastina rewa didomînin. Em ê heta dawî av û axa xwe biparêzin, dewleta Tirk bixwe têk çûye û nikare êrîşî QSD’ê bike, ji ber wê jî berê xwe dide sivîlan û êrîşî sivîlan dike. Tirsa dewleta Tirk ew e ku Kurd bibin xwedî azadî, ji ber ku ew dizane çiqas sûc li beramberî gelê Kurd pêk aniye. Pêwîste êdî dewleta Tirk bizanibe ev êrîş di dawiyê de dibe sedema kuştin û xirabiyê, divê siyaseta xwe ya qirêj biguhere û vî şerî rawestîne. Bila bizanibe ku em wek dayîk wê nobetên me li Bendava Tişrînê dawî nebin û wê karwanek here û wê yek vegere heya ku Bendava me rizgar bibe. Em wek dayik û jin vê dagirkeriyê qebûl nakin û em ê her tim vê dagirkeriyê red bikin.”
