Berdevka Yekîneyên Parastina Jin (YPJ) Ruksen Mihemed peyamek ji şêwra TAJÊ ya bi druşma ‘Ji bo edalet û azadiyê, tu jî bibe dengê dîlgirtiyên fermanê’ şand.
Ruksen Mihemed destpêka axaftina xwede silav û rêza xwe ji hemû jinên ku niha di şer û berxwedanê de amade ne re ragihand û diyar kir ku derketina jinan ji bo çarenûsa xwe, rol û mîsyona xwe, dîroka xwe û doza xwe gavên gelekî mezin û dîrokî ne û biryardariya xwe van gotinan anî ziman: “Rizgarkirina jinên Êzidî yên dîlgirtî, ji bo YPJ ne tenê erkeke siyasî, lê di heman demê de erkeke mirovî û exlaqî ye û divê tekoşîn ji bo dîtina û rizgarkirina wan berdewam bike.”
Berdevka YPJ’ê diyar kir ku jinên Êzidî yên ku xwe rêxistin kirine û hêza xwe ya parastinê ava kirine, encama tekoşîn û berxwedanên gelekî mezinin û wiha domand: “Ev pêvajo nîşan dide ku jin, dema xwe rêxistin dike, bi îrade û hebûna xwe dikare bibe xwediyê biryarê.”
Li ser giringiya rêxistinkirin û yekbûna jinan jî Ruksen Mihemed ev ev nirxandin kir: “Doza jin, dozakê giştî ye. Doza ku naye parçe kirin, ne sînor dikare wê parçe bike, ne sîstem dikare wê parçe bike. Doza jinê dozeke giştî ye. Ji bo wê doza jinên Êzidî jî tevahî jin û civakê eleqeder dike. Rizgarkirina wan divê di çarçoveya tekoşîna giştî ya jinan de were dîtin.
Ruksen Mihemed anî ziman ku gelek jinên Êzidî hene ku çarenûsa wan hîn ne diyare, got ku YPJ dê vê mijarê wek erkeke berdewam bidomîne û hemû hevalên xwe ji bo tevlêbûn û tevgerê bixe dewrê.
Ruksen Mihemed destnîşan kir ku jinên ku dîl hatine girtinê û di destê çeteyên DAÎŞ’ê de ne divê neyên ji bîrkirin. Li gorî wê, tekoşîna ji bo rizgarkirina wan jinan yek ji erkên sereke yên jinane.
Ruksen Mihemed got: “Emê jinên ku çarenûsa wan ne diyare, rizgar bikin. Emê hemû jinên dîl ketine destê çeteyên DAIŞ’ê rizgar bikin.”
Ruksen Mihemed daxuyakirin ku YPJ di van salên dirêj ên şoreşê de ne tenê ji bo jinên Rojavayê Kurdistanê xwe rêxistin kiriye, ji bo tevahî jinên Sûriyê û herêmê têkoşîn kiriye û wiha pêde çû: “Di her qadê şer de bi biryara xwe, bi hebûna xwe û bi îsrara xwe destkeftî bi destxistiye. Li gorî wê, YPJ di rizgarkirina gelek jinên Êzidî de bi hemû hevalên xwe re roleke girîng lîstiye û ev erk divê îro jî bidome.”
Berdevka YPJ diyar kir ku hêza jinê tenê di parastina xwe de nayê dîtin û piştrastkir ku jin dema bi ruhê xwe, bi manewiyata xwe, bi hebûna xwe û bi rêxistinkirina xwe tevger bike; dikare bibe xwediyê civaka xwe û dîroka xwe û got: “Dema jin xwe rêxistin dike, ji doza xwe bawer dike û bi îradeya xwe biryar dide, dikare guhertin û veguherînên gelek mezin çêbike. Her çiqas êriş û zihniyeta desthilatdar hebin jî, li gorî wê, jin îro bi zanîn, tecrûbe û xwebaweriyeke mezin gihîştiye qonaxeke ku tu kes nikare bi hêsanî îradeya wê bişkîne an li şûna wê biryar bide.”
Berdevka YPJ’ê Ruksen Mihemed bi biryardarî ragihand ku wê jin bi têkoşîna xwe vê sedsalê bikin sedsala jinê û sedsalên azadiya jinê û wiha bi dawî kir: “Li her qadên jiyanê û li her derê cihanê divê jin, bi rêxistinkirina xwe, bi baweriya xwe bi doza xwe û bi îradeya xwe tekoşîna xwe bidomîne. YPJ dê bi tecrûbeyên ku di salên dirêj ên tekoşînê de qezenc kiriye, parastina jinê û civakê bidomîne.”
