223 karkerên ku ji aliyê qeyûmê ve ji kar hatin derxistin, bi pêşengiya DÎSK û DÎSK GENEL-Îş’a Şaxa Wanê ve, di roja 41’emîn a berxwedana xwe de li Parqa Feqiyê Teyran daxuyanî dan û meşek lidarxistin. Di çalakiyê de pankarteke bi nivîsa “Derxistina 223 karkeran a bi bêmafî û bêhiqûqî nayê qebûlkirin. Em karê xwe dixwazin. Em ê bi berxwedanê bi ser bikevin” hate hildan. Her wiha dirûşmeyên “Qeyûmê diz ji Wanê bicehime” û “Qeyûm wê biçe, karker wê bên” hatin berzkirin.
Daxuyaniya çapemeniyê ji aliyê Elif Gemîcioglû ve ku yek ji karkerên ku ji kar hate derxistin e, hate xwendin. Gemîcioglû diyar kir ku di van rojên destpêka dibistanan de, dema ku malbat ji bo perwerdehiya zarokên xwe amadekarî dikin, bêkarî li wan hatiye ferzkirin û wiha got: “Tiştê ku ji me hatiye standin ne tenê meaşek e; pênûs, lênûsk, çenteyên piştê û mafê xwarina germ a nîvro ya zarokên me ye. Destê qeyûm ne tenê li karkeran, li pêşeroja zarokên me jî dirêj bûye.”
Gemîcioglû destnîşan kir ku tevî gef û zordariyan ew ê dev ji têkoşînê bernadin û wiha axivî: “Dema em karê xwe dixwazin, em ne tenê nanê xwe, lê pêşeroja zarokên xwe jî diparêzin. Qeyûm wê winda bikin, gelê Wanê û zarokên me wê bi ser bikevin.”
Çalakî bi rûniştina pênc deqîqeyan, bi çepik, dirûşme û tîlîliyan bi dawî bû. Di daxuyaniya çapemeniyê de, ji bilî rêxistinên civaka sivîl ên bajêr, parlamenterên Partiya Wekhevî û Demokrasiyê ya Gelan (DEM Partî) Zulkuf Uçar û Mahmut Dîndar jî amade bûn.
