Li Tirkiyeyê ya di bin rêveberiya AKP-MHP’ê de ku her ku diçe otorîter dibe, binpêkirinên mafan ên li girtîgehan dewam dikin. Girtiyên siyasî ku cezayê muebetê yê girankirî girtine, ji “Mafê Hêviyê”bêpar têne hiştin û mafên wan ên dermankirinê jî bi awayekî keyfî tê astegkirin. Derket holê ku yek ji wan girtiyên siyasî Alî Gulmez ê li Girtîgeha Ewlehiya Bilind a Tîpa F ya Hejmar 1’an a Îzmîr Kiriklarê tê girtin, ji ber ferzkirina pêkanîna wesayîta rîngê ya bi tîpa qefesê ya ji bo sewqê û êşkenceya dermankirina bi tevî kelepçe, nekariye emaliyeta fitiqê bibe. Wasiya Gulmez, Sevîm Kalman ku ji ANF’ê re axivî wiha got, “Hewl didin bi pêkanîna wesayîta rîngê ya bi tîpa qefesê mafê dermankirinê ya girtiyên nexweş asteng bikin. Ev yek nayê qebûlkirin.”
‘GULMEZ 24 SAL IN DI HUCREYA TECRÎDÊ DE YE’
Sevîm Kalman destnîşan kir ku Alî Gulmez ê girtiyê doza TKP/ML ku cezayê muebetê lê hatiye birîn, 25 sal in di girtîgehê de ye û 24 sal in di hucreya tecrîdê ya yek kesî de tê girtin. Kaman bilêv kir ku ev girtîbûna bi salan bûye sedema xirabûna tenduristiyê wî û got pirsgirêkên wî yên gurçik, dil, şekir û prostat heye. Kalman diyar kir ku beriya çend mehan du stend li dilê Gulmez hatine bicihkirin, lê ji ber ku girtiyê cezayê muebetê yê girankirî ye, destûr nehatiye dayîn ku kes li gel wî bimîne.
‘JI BER PÊKANÎNA WESAYÎTÊ RÎNG Ê TÎPA QEFES NIKARE EMELIYAT BIBE’
Kalman diyar kir ku divê Gulmez tavile emeliyeta fitiqê bibe, lê ji ber pêkanînên keyfî yên rêveberiya girtîgehê mafê wî yê dermankirinê tê astengkirin û wiha got, “Divê ji bo emeliyata fitiqê ya Alî Gulmez, roj ji Nexweşxaneya Bajêr a Îzmîrê bê girtin, lê ji ber ku di sewqên nexweşaneyê de pêkanîna wesayîta rîng ê bi tîpa qefesê tê ferzkirin, Alî Gulmez nikare emeliyat bibe. Ev wesayîtên rîng ê bi tîpa qefesê naşibe wesayîtên rîngê yên din. Herî dawî birayê Gulmez di 28’ê Cotmehê de serdana wî kir û ji birayê xwe re got ku ji ber pêkanîna wesayîta rîng ê bi tîpa qefesê emeliyat nabe.
‘RÊVEBERIYA GIRTÎGEHÊ DIVÊ TAVILE DAWÎ LI VAN PÊKANÎNÊN NEMIROVÎ BÎNE’
Sevîm Kalman ku di heman demê de parêzvana mafên mirovan e, destnîşan kir ku wesayîta rîngê ya bi tîpa qefesê ku li girtiyan tê ferzkirin, ne mirovî ye. Kalman bilêv kir ku Gulmez hem bi salan in di hucreya tecrîdê ya yek kesî de tê girtin, hem jî tê xwestin sewqên nexweşxaneyan di şert û mercên tecrîdê de bên kirin û got ku ev yek nayê qebûlkirin.
Kalman destnîşan kir ku di demeke ku ji bo girtiyên muebetê yê girankirî ‘Mafê Hêviyê’ tê nîqaşkirin de, di girtîgehan de şert û mercên tecrîdê girantir bûne û wiha got, “Dadgeha Mafên Mirovan a Ewropayê diyar kir ku heta bi hetayî girtina kesekî di girtîgehê de êşkence ye û biryara pêkanîna ‘Mafê Hêviyê’ dan. Lê Tirkiye ku alîgirê biryarên DMME’ê ye, derbarê vê êşkenceyê de tu vesererastkirin nekir, ji bo sewqkirina girtiyan wesayîtên rîngê bi kar tîne. Ji ber vê pêkanîna keyfî mafê dermankirinê ya girtiyan tê astengkirin û tenduristiya wan xiraptir dibe. Tevî ku wesayîtên rîngê yên asayî hene jî, girtiyan bi wesayîtên rîngê yên bi tîpa qefesê sewqî nexweşaneyan dikin, ev yek pêkanînekî ne mirovî ye. Divê Girtîgeha Ewlehiya Bilind a Tîpa F ya Hejmar 1’an a Îzmîr Kiriklarê tavile dawî li vê pêkanînê bîne û xwegihandina girtiyan ji bo tenduristiyê bê pêkanîn.”
