Li Amedê kelecana Newrozê dest pê kir. Pîrozbahî, dê li Parka Newrozê ya li navçeya Rezanê bi dirûşmên “Newroza azadî û yekitiya demokratîk” û “Newroza azadî û demokrasiyê” bê lidarxistin. Têketina qada Newrozê hêj dest pê nekiriye. Xelkê bajar, hêj saetên serê sibehê ve ber bi qadê ve bi rê ketin. Ji 7 salî heta 70 salî her kes ber bi qadê ve diçe û li her çar aliyên qadê coşa Newrozê her ku diçe mezintir dibe.
Girseya ku li pêşiya noqteya li aliyê Yenîhalê hatiye danîn kom bû, gelek caran dirûşmên “Bijî Serok Apo” û “Bê Serok jiyan nabe” berz dikin û govendê digerînin.
Noqteyeke din a gel lê kom bûyî jî Deriyê Zumrut Kentê ye. Gelek kesên ji saetên zû yên serê sibehê ve berê xwe dan qadê, li vir kom bûn. Coşa welatiyên rûyê xwe bi rengên kesk, sor û zer boyax kirin balê dikişîne.
Gelek welatiyan cil û bergên Kurdî li xwe kirine û li qadê dengê dirûşma “Bijî Serok Apo” olan dide.
Komîteya Amadekar a Newrozê, ji bo parastina ewlehiya qadê 600 kes peywirdar kir. Di her noqteya têketina qadê de wekîlên DEM Partiyê, endamên PM’ê û parêzer hene.
Tê payin ku têketina qadê saet di 10.00’ê de dest pê bike. Hevserokê Giştî yê DEM Partiyê Tuncer Bakirhan, Serokê Giştî yê Partiya Azadî Ayetullah Aşitî, aktivîsta TJA’yê Ayla Akat Ata, Çetîn Arkaş û Leyla Zana dê di pîrozbahiyê de biaxivin.
Her wiha dê peyama girtiyên siyasî, Serokê YNK’ê Bafil Talabanî û Serokê Herêma Federe ya Kurdistanê Nêçîrvan Barzanî jî dê bên xwendin.
Her wiha tê payin ku peyama Rêber Apo jî were xwendin.
Endamê Şandeya Îmraliyê yê DEM Partiyê Sirri Sureyya Onder ku di 3’yê Gulana 2025’an de jiyana xwe ji dest dabû jî dê bi pêşandana sînevîzyonekê were bibîranîn.
Hunermend Dîlan Top û Erkan Top, Alend Hazim, Agirê Jiyan û Zinar Sozdar dê derkevin ser dikê.
