Li Venezuelayê piştî du erdhejên bi mezinahiya 7,2 û 7,5 xebatên lêgerîn û rizgarkirinê di şert û mercên krîtîk de dewam dikin.
Wezîrê Tenduristiyê Carlos Alvarado ragihand ku hejmara kesên jiyana xwe ji dest dane, gihişt 235’an. Rayedaran jî ragihand ku hejmara birîndaran herî kêm gihişt hezar û 520’an.
Yek ji herêmên ku herî zêde ji erdhejan bandor bûye, eyaleta La Guaira ya nêzî paytext Caracas e. Qada Hewayî ya Maiquetia ya Navneteweyî ji ber zirara li binesaziya wê çêbûyî, hate girtin. Li bajarê Catia la Mar gelek avahî hilweşiyan. Tîm hewl didin xwe bigihînin kesên di bin kavilan de mane, lê ji ber kêmbûna makîneyên kar ên giran û malzemeyan, bi zehmetî xebatên xwe didomînin.
Mexdûrên erdhejan ji bo rizgarkirina xizmên xwe, bi derfetên xwe hewl didin kavilan rakin. Gelek kes ji ber erdhejên xurt, neçar man ku şevê li kolanan yan di wesayîtên xwe de derbas bikin.
Civaka navneteweyî jî piştî karesatê kete nava liv û tevgerê. Dewletên Yekbûyî yên Emerîka (DYE) ragihand ku ew ê 150 milyon dolar alîkarî bişîne, Brezîlya, Çîn, Hindistan, Ewropa, welatên Latîn Emerîkayê û Îranê jî diyar kirin ku ew ê alîkarî bidin Venezuelayê.
