Parlamenterê DEM Partiyê Alî Bozan pêvajoya “Aştî û Civaka Demokratîk” nirxand û anî ziman ku mifteya çareseriyê “Wekheviya navbera aktoran” e. Bozan diyar kir ku di atmosfera siyasî ya nû de ku 22’ê Cotmehê destpê kir, ji gavên hiqûqî wêdetir pêwîstî bi îradeyeke polîtîk heye û ragihand ku aktorê sereke Rêber Apo divê karibe ji “mafê hêviyê” sûdê werbigire û azad bibe.
Bozan anî ziman ku piştî biryara Dadgeha Mafên Mirovan a Ewropayê ya têkildarî Rêber Apo, nîqaşên li ser “mafê hêviyê” bi sala 2024’an re derbasî asteke nû bûn, bi daxuyaniyên Serokê Giştî yê MHP’ê Devlet Bahçelî re mijar bû xweedî aliyekî siyasî û got, “Aktorên ku îro gavên diavêjin û xweedî li pêvajoyê derdikevin Birêz Erdogan û Birêz Bahçelî ne. Li aliyê din aktorê herî girîng jî Birêz Abdullah Ocalan e. Ji bo çareseriya meseleya bingehîn divê aktor di nava mercên wekhev de bin. Ev wekhevî hem divê bi şertên fîzîkî be hem jî bi derfetên qenalên ragihandinê yên bêsînor bin. Sûdwergirtina Birêz Ocalan ji ‘mafê hêviyê’ û azadiya wî, mafekî mecbûrî yê ji bo vekirina rêya aştiyê ye.”
Bozan işaret bi kapasîteya çareseriyê ya aktorê bingehîn ê pêvajoyê Rêber Apo kir û destnîşan kir ku ji bo avakirina aştiyê divê Rêber Apo karibe têkiliyeke yekser bi raya giştî re dîne. Bozan got, “Li vî welatî îradeya ku karibe şer û pêvajoyê bi rê ve bibe diyar e. Ji bo Birêz Abdullah Ocalan karibe bi hêsanî bi rola xwe rabe divê karibe hevdîtinan bike, fikrên xwe parve bike. Ev gav wê baweriya bi pêvajoyê ya li nava civakê hîn zêde bike.”
Bozan bal kişand ser gotina “Aştî weke çûkekê ye. Çûk bi baskekî nikare bifire” ya Devlet Bahçelî ya li ser pêvajoya aştiyê û got, “Aştî weke çûkekê ye. Baskekî vê çûkê dewlet be, baskê din jî Birêz Ocalan e. Ji bo çûkek karibe bifire divê herdu baskên wê azad bin. Bicihanîna mafê hêviyê, yekane rê ye ku aştî karibe bi rengekî çêker bifire.”
‘ASTENGKIRINAN BERDANÊ PROVOKASYON E’
Bozan li ser kiryarên li girtîgehan jî axivî û diyar kir ku hin avaniyên îdarî hene ku li dijî ruhê çareseriyê tevdigerin û astengkirina berdana girtiyan a bi destê Desteyên Çavdêrî û Îdareyê weke provokasyonê nirxand. Bozan got, “Ji bo girtiyên siyasî bêne berdan pêwîstî bi sererastkirineke qanûnî ya nû nîne. Bicihanîna hiqûqa heyî û bidawîkirina biryarên kêfî têrê dike.”
