Çalakiya ku li Wargeha Penaberan a Şehîd Rustem Cûdî (Mexmûr) ji bo azadiya fîzîkî ya Rêber Apo di 20’ê Tîrmeha 2023’yan de hatiye destpêkirin, di roja 727’yan de bi koma 142’yan didome.
Merasîma dewrgirtinê li Saziya Malbatên Şehîdan a wargehê bi tevlîbûna çalekvanan û xelkê wargehê re bi deqeyek rêzgirtinê destpê kir. Piştî rêzgirtinê li ser navê koma 141’an Qedrî Şirîşeyî axivî.
Qedrî Şirîşeyî di destpêka axaftinên xwe de şehîdên berxwedana 14’ê Tîrmehê bi bîr anî û wiha got: “Em tecrîda ku li ser Rêbertî û di kesayeta Rêbertî de li ser tevahî dîlên azadiyê û gelê Kurd, şermezar dikin. Ev çalakiya ku ji aliyê civaka me ve hatî destpêkirin du salên xwe tejî kir, bi vê boneyê em di nava vê hefteyê de, di nava agahiyên pir germ de derbaz dibin. Yek ji wana piştî 26 salan me dîmenê Rêbertî bi deng û rengê wî çawan dît bû sedema kêfxweşiyek mezin û manewiyetekî bilind ji bo gelê Kurdistanê û tevahî gelên Rojhilata Navîn. Di heman demê de çalakiya dîrokî ya ku çêbûyî, ku nîv sedsale bi şerê çekdarî yê gerîla dimeşe, mirov dikare bêje nimûneya wê tinebû. Li Rojhilata Navîn cara yekeme ku çalakiyek wisa tê kirin ku çek bi awayek fîlî tên şewitandin û ji qonaxekî derbazî qonaxekî nû dibe. Bi vê boneyê em dibêjin, Kesek Nikare Roja Me Tarî Bike, Bijî Serok Apo.”
Çalakî b berzkirina dirûşmeyên “Bijî Serok Apo” û “Bê Serok Jiyan Nabe” dewrî koma 142 hat kirin.
