Çalakiya nobetê ya li Wargeha Penaberan a Şehîd Rûstem Cûdî (Mexmûr) ku di 20’ê Tirmeha 2023’an de ji bo azadiya fîzîkî ya Rêber Apo hatiye destpêkirin, bi kom 176’an 900 roj li pey xwe hişt.
Merasîma dewrgirtina çalakiya nobetê li Saziya Malbatên Şehîdan a Wargeha Mexmûrê, bi deqeyek rêzgirtinê ji bo hemû şehîdên Tevgera Azadiya Kurdistanê destpê kir. Piştî rêzgirtinê li ser navê koma 175’an Helîm Îşlek axivî.
Helîm Îşlek diyar kir ku zêdeyî du sal û nîvin wan çalakiya nobetê daye destpêkirin û wiha axivî: “Çalakiya me ji bo azadiya fîzîkî ya Rêber Apo ye. Heta ku Rêber Apo bi awayek fîzîkî neyê di nav me de û azad ne axive baweriya me bi dewletê nayê. Ji ber ku her tiştê ketî ser milê gelê Kurd û Rêbertî pêkanîn, êdî ya dewletê maye. Heta ku Serokatiya me bi awayek fîzîkî neye di nava gelê Kurd de em dest ji çalakiyên xwe bernadin.”
Çalakî bi dirûşmeyên ‘Bijî Rêber Apo’, ‘Bê Serok Jiyan Nabe’ dewrî koma nû hate kirin.
