Di nûçeya CBS Newsê ya DYE’yê de ku agahiyên xwe dispêre belgeyên nû yên ji aliyê Wezareta Edaletê ve hatin eşkerekirin, têkiliya nêz a navbera Epstein û Tom Barrack û nivîsên navbera wan hatin weşandin.
Di nûçeyê de hate ragihandin ku zêdeyî 100 e-mail û peyam hatin lêkolîn û nivîsên navbera herdu kesan piştî mehkûmiyeta Epstein jî dewam kiriye. Belge radixe pêş çavan ku Barrack bi Epstein re têkiliya civakî û profesyonel dewam kiriye, têkiliyên kar, vexwendinên taybet û danasînên dîplomatîk ji van danûstandinan bûn.
Li gorî qeydan, dibe ku Eptesin dem bi dem Barrack weke têkiliyeke ji bo ragihandina agahiyan ji Trump re dîtibe. Lê belê di belgeyan de tê îdîakirin ku delîlek nehatiye dîtin ku peyamên Epstein ji Trump re hatine ragihandin an jî Trump bi rêya Barrack têkilî bi Epstein re daniye.
Her wiha ti delîl nîne ku nîşan bide Barrack beşdarî sûcên Epstein bûye yan jî haya xwe ji van hebû.
Lê belê di Îlona 2009’an de çend meh piştî ku Epstein ji girtîgeha Palm Beach County hate berdan, li gorî belgeyan Barrack jê re ev yek nivîsî: “Ez li te difikirim, hêvîdarim tu başî û jiyana te jinûve aram bûye.” Ev peyam weke destpêka demeke nû ya têkiliyê tê nirxandin.
Barrack ê 78 salî di kampanya hilbijartinê ya Trump a sala 2016’an de bû yek ji wan kesan ku alîkarî gelekî kom kir û piştî hilblijartinê komîteya merasîma sondxwarinê bi rê ve bir. Her wiha weke şêwirmendekî bi bandor ê polîtîkayên Rojhilata Navîn li Qesra Spî wezîfe kir. Hîn jî Sefîrê Bilind ê DYE’yê yê li Tirkiyeyê û Nûnerê Taybet ê Sûriyeyê ye.
