Abdullah Çelîk ê ku li Girtîgeha Tîpa F’ê ya Boluyê 7 caran berdana wî hate taloqkirin û di 3’ê Îlonê de azad bû, piştî 32 salan li bajarê xwe Êlihê bi girseyî hate pêşwazîkirin.
Komeleya Piştevanî û Alîkariyê ya bi Malbatên Girtî û Hikumxwaran re (TUHAY-DER) û nûnerên partiyên siyasî û civaka sîvîl û gelek welatî bi coş Çelîk pêşwazî kirin.
Girseya ku li Bajarojê Girê Sîra a Êlihê kom bû, bi çepik, tilîlî û dirûşmeya “Bijî berxwedana zindanan” silav dan Çelîk. Çelîk yek bi yek silav da her kesî.
Çelîk ê ku li vir axaftineke kurt kir, destnîşan kir ku ew ê têkoşîna xwe bidomîne û wiha got: “Gelê Kurd hem li hundir û hem jî ji derve berxwedaneke mezin dimeşîne. Em ê bibin pêşeng, şopdar û serkeftîvanên vê berxwedanê. Girtîbûna min a 32 salan lêlê ye, hê lolo maye. Em ê berxwedanê bidomînin.”
Piştî pêşwazîkirinê, bi konvoyeke derbasî Taxa Seyîtlerê bûn. Çelîk li vir jî rastî eleqeyekî mezin hat û gel hembêz kir.
DERBARÊ ÇELÎK DE
Çelîk 6’ê Mijdara 1993’an de bi biryara Dadgeha Ewlehiyê ya Dewletê (DGM) hate girtin. Berdana Çelîk ku li girtîgehên Stenbol, Ordû, Edîrne, Enqere û Boluyê ma, 7 caran hate taloqkirin. Herî dawî 3’ê Îlona 2025’an li Girtîgeha Tîpa T ya Boluyê hate berdan.
